	Veðurstofa Íslands Jarðeðlissvið

Jarðskjálftar 20180709 - 20180715, vika 28

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Rúmlega 300 jarðskjálftar voru staðsettir með SIL-mælakerfi Veðurstofu Íslands í vikunni, litlu fleiri en vikuna á undan. Mesta virknin var úti fyrir Norðurlandi. Minni virkni var undir Bárðarbungu og í Öræfajökli, miðað við vikuna á undan, en heldur meiri í Kötlu. Jarðskjálfti af stærð 3,6 varð í skjálftaröð sem hófst 11. júlí kl. 21:10 norðvestur af Gjögurtá. Skjálftinn fannst á Siglufirði, Ólafsfirði, Akureyri, Húsavík og í Fnjóskadal. Þessi skjálfti var jafnframt stærsti skjálfti vikunnar.

Suðurland

Rólegt var á Hengilssvæðinu. Tveir smáskjálftar mældust við Heklu. Á annan tug smáskjálfta mældist á Suðurlandsundirlendi og nokkrir í Ölfusi,

Reykjanesskagi

Um 20 skjálftar mældust á Reykjanesskaga, flestir við Reykjanestá og vestan við Kleifarvatn. Tiltölulega rólegt var við Krýsuvík. Stærstu skjálftarnir voru við Reykjanestá, tæp tvö stig aðrir minni.
Jarðskjálftahrina hófst skömmu fyrir miðnætti 14. júlí um 10 km suðaustur af Eldeyjarboða á Reykjaneshrygg. Hrinan stóð fram eftir nóttu og var stærsti skjálftinn tæp þrjú stig. Um tugur skjálfta mældist um 5 kílómetra norðaustur af Geirfuglaskeri á Reykjaneshrygg þann 9. júlí, allir um og innan við tvö stig.

Norðurland

Rúmlega 100 skjálftar mældust úti fyrir Norðurlandi í vikunni. Mesta virknin var um 14 kílómetra norðvestur af Gjörgurtá en þann 11. júlí kl. 21:10 hófst skjálftaröð á þeim stað með skjálfta af stærð 3,6. Tilkynningar bárust um að skjálftinn hefði fundist á Siglufirði, Ólafsfirði, Akureyri, Húsavík og í Fnjóskadal. Tveir aðrir skjálftar voru yfir tveimur stigum, aðrir minni. Virknin hélt áfram næstu daga og alls mældust yfir 60 skjálftar á þessum slóðum. Nokkrir skjálftar mældust norðar í Eyjafjarðaráli. Um tugur skjálfta mældist á Skjálfanda og litlu fleiri í Öxarfirði. Tiltölulega rólegt var við Grímsey.
Nokkrir skjálftar mældust við Kröflu og Þeistareyki, allir innan við tvö stig.

Hálendið

Heldur minni virkni var undir Vatnajökli í þessari viku en þeirri fyrri. Þessa viku mældust tæplega 40 jarðskjálftar miðað við 90 í síðustu viku. Við Bárðarbungu var frekar rólegt, líkt og vikuna á undan, en þar mældust innan við 10 skjálftar. Stærsti skjálftinn var 1,9 að stærð og varð 13. júlí kl. 18:25. Fimmtán skjálftar mældust í Öræfajökli, flestir við austanverðan öskurimann. Stærsti skjálftinn varð 11. júlí kl. 00:45, 1,4 að stærð. Þetta er mun minni virkni en í síðustu viku þegar um 70 skjálftar voru staðsettir á svæðinu. Tveir litlir skjálftar urðu við Grímsfjall.

Ríflega 60 jarðskjálftar mældust á svæðinu norðan við Vatnajökul, flestir í nágrenni Öskju. Tæplega 20 jarðskjálftar mældust um 8 kílómetrum norður af Dreka. Stærstu skjálftarnir voru rúmt stig að stærð og allir á yfir 20 kílómetra dýpi. Yfir 20 smáskjálftar urðu við austanvert Öskjuvatn.

Mýrdalsjökull

Um 20 jarðskjálftar voru staðsettir undir Mýrdalsjökli í vikunni, flestir í sunnanverðri Kötlusökjunni en þar varð lítil skjálftahrina aðfaranótt 13. júlí. Stærsti skjálftinn í jöklinum varð í þeirri hrinu kl. 01:02, 2,9 að stærð. Nokkrir smáskjálftar mældust á Torfajökulssvæðinu.

Jarðvakt