	Veðurstofa Íslands Jarðeðlissvið

Jarðskjálftar 20181015 - 20181021, vika 42

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Tæplega 190 jarðskjálftar mældust með SIL-mælakerfi Veðurstofu Íslands í vikunni, heldur færri en vikuna á undan þegar um 250 jarðskjálftar mældust. Stærsti skjálfti vikunnar var 2,5 að stærð við Grindarskörð þann 18. október kl. 00:36. Engir skjálftar mældust við Heklu. Rólegt var í Mýrdalsjökli og Bárðarbungu og einnig var minni virkni í Öræfajökli miðað við vikuna á undan.

Suðurland

Rúmlega 25 smáskjálftar mældust á Suðurlandi í vikunni, þar af 15 á Suðurlandsbrotabeltinu, helmingi færri en vikuna á undan. Átta smáskjálftar mældust á Hengilssvæðinu. Engir skjálftar mældust í Heklu.

Reykjanesskagi

Rúmlega 30 jarðskjálftar mældust á Reykjanesskaga í vikunni, nokkru fleiri en vikuna á undan þegar 20 skjálftar mældust. Flestir skjálftar mældust norður af Helgafelli, við Bláfjöll og suðvestur af Kleifarvatni. Stærsti skjálftinn var 2,5 að stærð, þann 18. október kl. 00:36 við Grindarskörð. Engir skjálftar mældust á Reykjaneshrygg.

Norðurland

Rúmlega 30 jarðskjálftar mældust á Tjörnesbrotabeltinu í vikunni, nokkuð færri en vikuna á undan. Sá stærsti 2,2 að stærð, þann 18. október kl. 14:34. norður á hrygg. Fimm smáskjálftar mældust í Grímseyjarbeltinu og sex á Húsavíkur-Flateyjarmisgenginu, sá stærsti 1,3 að stærð. Tæplega 20 jarðskjálftar mældust í Öxarfirði, sá stærsti 1,5 að stærð. Sjö smáskjálftar mældust við Þeistareyki og tveir við Kröflu.

Hálendið

75 jarðskjálftar mældust undir Vatnajökli í vikunni, nokkru fleiri en í vikunni á undan þegar þeir voru tæplega 55. Um 20 skjálftar mældust í Öræfajökli, mun færri en í síðustu viku þegar 40 skjálftar mældust. Stærsti skjálftinn þar var 2,1 að stærð, þann 15. október kl. 03:30. Tæplega tíu smáskjálftar mældust í Bárðarbungu, en í vikunni á undan voru þeir fjórir. Tveir djúpir smáskjálftar mældust þar sem berggangurinn beygir til norðausturs og oft mælast djúpir skjálftar. Níu skjálftar mældust við Grímsvötn, sá stærsti 2,1 að stærð, þann 19. október kl. 14:38. Fimm smáskjálftar mældust í Öskju. Tæplega 20 smáskjálftar mældust við Herðubreið og Herðubreiðartögl, sá stærsti 1,3 að stærð. Einn smáskjálfti, 1,6 að stærð mældist suðvestur af Langjökli.

Mýrdalsjökull

Sex jarðskjálftar, allir undir einum að stærð mældust á víð og dreif í Mýrdalsjökli í vikunni, nokkuð fleiri en vikuna á undan. Rúmlega 11 jarðskjálftar mældust á Torfajökulssvæðinu, sá stærsti 2,1 að stærð, þann 15. október kl. 01:00.

Jarðvakt