	Veðurstofa Íslands Jarðeðlissvið

Jarðskjálftar 20181022 - 20181028, vika 43

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Rúmlega 270 jarðskjálftar mældust með SIL-mælakerfi Veðurstofu Íslands í vikunni, talsvert fleiri en vikuna á undan þegar um 190 jarðskjálftar mældust. Stærsti skjálfti vikunnar var M4,6 að stærð við Bárðarbungu þann 23. október kl. 00:08. Nokkrum mínútum síðar fylgdi honum annar skjálfti á sama stað af stærð 3,5. Tveir skjálftar urðu á sömu slóðum fyrir miðnætti þann 22. október kl. 23:34 og 23:35 og mældust 2,8 og 3,9 að stærð. Skjálfti af stærð 3,0 mældist kl. 10:52 við Krýsuvík þann 28. október og fannst hann m.a. á Höfuðborgarsvæðinu. Fimm skjálftar mældust við Heklu. Meiri virkni var í Mýrdalsjökli og Bárðarbungu og í Öræfajökli miðað við vikuna á undan.>

Suðurland

Rúmlega 15 smáskjálftar mældust á Suðurlandi í vikunni, þar af 12 á Suðurlandsbrotabeltinu, helmingi færri en vikuna á undan. Enginn skjálfti mældist á Hengilssvæðinu. Fimm smáskjálftar mældust í Heklu allir undir 1,0 að stærð.

Reykjanesskagi

Fjörutíu jarðskjálftar mældust á Reykjanesskaga í vikunni, nokkru fleiri en vikuna á undan þegar 30 skjálftar m ældust. Flestir skjálftar mældust við Reykjanestá og um 4 km norður af Krýsuvík í smáhrinu sem þar varð 28. október kl. 10:52 um 4 km norðan við Krýsuvík. Hann fannst m.a. í Hafnarfirði, Reykjavík og Seltjarnarnesi. Fimm skjálftar mældust á Reykjaneshrygg í smáhrinu þann 24. október allir á bilinu 2,1 - 2,7 að stærð.

Norðurland

Rúmlega 40 jarðskjálftar mældust á Tjörnesbrotabeltinu í vikunni, nokkuð fleiri en vikuna á undan. Sá stærsti 2,2 að stærð, þann 18. október kl. 14:34. norður á hrygg. Fimm smáskjálftar mældust í Grímseyjarbeltinu og rúmlega 30 á Húsavíkur-Flateyjarmisgenginu, sá stærsti 2,4 að stærð. Tæplega 10 jarðskjálftar mældust í Öxarfirði, sá stærsti 1,3 að stærð. Fimm smáskjálftar mældust við Þeistareyki og fjórir við Kröflu.

Hálendið

Rúmlega 90 jarðskjálftar mældust undir Vatnajökli í vikunni, nokkru fleiri en í vikunni á undan þegar þeir voru tæplega 75. Rúmlega 40 skjálftar mældust í Öræfajökli, mun fleiri en í síðustu viku þegar 20 skjálftar mældust. Stærsti skjálftinn þar var 2,2 að stærð, þann 28. október kl. 13:51. Rúmlega 20 skjálftar mældust í Bárðarbungu, mun fleiri en í vikunni á undan, þegar þeir voru um 9 talsins. Fjórir stórir skjálftar urðu í Bárðarbungu í vikunni, tveir þann 22. október kl. 23:34 og 23:35 2.8 og 3.9 að stærð. Eftir miðnætti kl. 00:08 þann 23. október varð skjálfti þar af stærð 4,6 á sömu slóðum. Er hann fimmti stærsti skjálftinn í Bárðarbungu frá goslokum og jafnframt stærsti skjálfti vikunnar. Fjórum mínútum síðar (kl. 00:12 23.10.2018) varð skjálfti af stærð 3,5 á sama stað. Níu djúpir smáskjálftar mældust þar sem berggangurinn beygir til norðausturs og oft mælast djúpir skjálftar. Átta skjálftar mældust í bergganginum undir og við Dyngjujökul. Fjórir skjálftar mældust við Grímsvötn, sá stærsti 2,8 að stærð, þann 27. október kl. 23:18. Tveir smáskjálftar í Hamrinum og einn á Lokahrygg. Tíu smáskjálftar mældust í Öskju. Tæplega 20 smáskjálftar mældust við Herðubreið og Herðubreiðartögl, sá stærsti 1,1 að stærð.

Mýrdalsjökull

Tæplega 30 jarðskjálftar, allir undir 2,1 að stærð mældust á víð og dreif í Mýrdalsjökli í vikunni, mun fleiri en vikuna á undan. Helmingur þeirra var í og við Kötlujökul. Allir undir 1,0 að stærð. Fimm jarðskjálftar mældust á Torfajökulssvæðinu, allir undir 1,0 að stærð.

Náttúruvársérfræðingur á vakt fyrirspurnir@vedur.is>Jarðvakt