	Veðurstofa Íslands Jarðeðlissvið

Jarðskjálftar 20181105 - 20181111, vika 45

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Rúmlega 410 jarðskjálftar mældust með SIL-mælakerfi Veðurstofu Íslands í vikunni, talsvert fleiri en vikuna á undan þegar um 350 jarðskjálftar mældust. Stærsti skjálfti vikunnar var 3,9 að stærð um 100 km norðaustur af Kolbeinsey þann 8. nóvember um kl.18. Þann 6. nóvember hófst skammvinn skjálftahrina austan við Grímsey, þar mældist stærsti skjálftinn 3,0 þann 10. nóvember kl. 21:23. Flestir jarðskjálftar vikunnar urðu í grennd við Grímsey eða um 170 skjálftar. Um 70 jarðskjálftar mældust undir Vatnajökli í vikunni, þar af aðeins 6 við Öræfajökul.

Suðurland

Um 50 skjálftar mældust á Suðurlandi þar af um 30 á Suðurlandsbrotabeltinu. 17 skjálftar mældust um 5 km suðvestan við Heklu og 3 smáskjálftar í fjallinu sjálfu. Skjálftarnir suðvestan við Heklu voru á bilinu 0,3-1,1 og mældust frá 10 km dýpi dagana 6. og 7. nóvember. Fimm skjálftar mældust Hengilssvæðinu sá stærsti 1,1 og einn í Vatnafjöllum.

Reykjanesskagi

20 jarðskjálftar mældust á Reykjanesskaga í vikunni, sem var svipaður fjöldi og vikuna áður þegar 17 jarðskjálftar mældust. Sá stærsti mældist 1,6 norðan við Grindavík. Sunnan og vestan við Kleifarvatn mældust 12 skjálftar sá stærsti 1,5. Fjórir skjálftar á bilinu 2,8-3,4 mældust úti á Reykjaneshrygg um 250 km frá Reykjanestá.

Norðurland

Um 200 skjálftar mældust á Tjörnesbrotabeltinu í vikunni. Flestir þeirra mældust í tveimur hrinum austan og suðaustan við Grímsey. Um 40 skjálftar mældust austan við Grímsey þann 6. nóvember, sá stærsti 2,7 og um 130 skjálftar suðaustan við Grímsey dagana 9.-11. nóvember sá stærsti 3,0 að stærð þann 10. nóvember. Tveir jarðskjálftar mældust norður undan Eyjafirði, sex í Skjálfanda og tíu í Öxarfirði, sá stærsti 1,9. Tveir skjálftar mældust við Kröflu og 3 austan við Mývatn.

Hálendið

Rúmlega 70 jarðskjálftar mældust undir Vatnajökli í vikunni, litlu færri en í vikunni áður þegar mældust 85 skjálftar. Þar af voru aðeins 6 skjálftar í Öræfajökli töluvert færri en síðustu vikur. Stærsti skjálfti þessarar viku í Öræfajökli var 1,8. 24 skjálftar mældust í og við öskjuna í Bárðarbungu auk þess sem 16 skjálftar mældust í bergganginum. Átján skjálftar mældust í og við Grímsvötn, þar af hrina af fjórum skjálftum á bilinu 1,6-2,6 þann 7. nóvember. Fimm jarðskjálftar mældust við Lokahrygg og fjórir vestan við Þórðarhyrnu. Tveir skjálftar mældust í Kerlingarfjöllum, 1,3 og 1,9 að stærð og 4 í kringum Langjökul, sá stærst 2,3. Átta skjálftar mældust í Öskju og 13 við Herðubreið og Herðubreiðartögl.

Mýrdalsjökull

18 skjálftar mældust í Mýrdalsjökli, þeir stærstu 1,7 og 1,9 í austanverðri öskjunni. Af þessum voru 11 smáskjálftar í Kötlujökli. Tveir jarðskjálftar af stærð 1,0 og 1,1 mældust í Eyjafjallajökli, einn skjálfti mældist á Torfajökulssvæðinu en þrír smáskjálftar við Eldgjá.

Jarðvakt