	Veðurstofa Íslands Jarðeðlissvið

Jarðskjálftar 20181119 - 20181125, vika 47

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Rúmlega 460 jarðskjálftar mældust með SIL-mælakerfi Veðurstofu Íslands í vikunni, mun fleiri en vikuna á undan þegar þeir voru um 250. Svipuð eða meiri virkni var á öllum svæðum miðað við fyrri viku. Þrír skjálftar mældust yfir 3 að stærð í vikunni, sá stærsti var 3,5 að stærð austur af Hamrinum við Vestari Skaftárkelil þann 23. nóvember kl 21:37. Annar var 3,3 að stærð norður af Bláfjallaskála 24. nóvember kl 11:44 og fannst víða á Höfuðborgarsvæðinu og Suðurlandi. Sá þriðji var 3,2 að stærð í Grímsvötnum þann 23. nóvember kl 05:41 og er stærsti skjálfti sem mælst hefur í Grímsvötnum frá 2011. 28 smáskjálftar mældust í Heklu í vikunni. Minni virkni var í Bárðarbungu og Öræfajökli miðað við fyrri viku og svipuð virkni í Mýrdalsjökli.

Suðurland

Tæplega 50 jarðskjálftar mældust á Suðurlandsbrotabeltinu í vikunni sem er mun meiri fjöldi en í síðustu viku. Allir skjálftarnir voru innan við tveir að stærð. 15 skjálftar mældust á Hengilssvæðinu. 28 skjálftar mældust í Heklu, allir undir einum að stærð. Flestir skjálftanna voru sunnan við toppgýginn en 6 í toppgýgnum sjálfum. 24 skjálftanna komu í smáhrinu snemma að morgni 24. nóvember.

Reykjanesskagi

65 skjálftar mældust á Reykjanessskaga í vikunni, mun fleiri en í síðustu viku þegar 34 skjálftar mældust. Stærsti skjálftinn var 3,3 að stærð um 4 km norður af Bláfjallaskála í smá hrinu sem varð 24. nóvember og hófst með stóra skjálftanum kl 11:44. Stærsti eftirskjálftinn varð tveimur mínútum síðar 2,9 að stærð. Tilkynningar bárust Veðurstofunni um að stærsti skjálftinn hafi fundist á Höfuðborgarsvæðinu, Hveragerði og Hellu. 30 skjálftar mældust við Kleifarvatn, allir undir 2 að stærð og flestir í lítilli hrinu að kvöldi 19. nóvember. Fjórir skjálftar mældust á Reykjaneshrygg, sá stærsti 2,4 að stærð.

Norðurland

Um 90 jarðskjálftar mældust á Tjörnesbrotabeltinu í vikunni, mun fleiri en vikuna á undan þegar tæplega 60 skjálftar mældust. Stærsti skjálftinn var 2,0 að stærð um 18 km norðnorðaustur af Siglufirði. Rúmlega 40 jarðskjálftar mældust á Grímseyjarbeltinu og svipaður fjöldi á Húsavíkur-Flateyjar misgenginu. 13 smáskjálftar mældust við Kröflu.

Hálendið

Rúmlega 90 jarðskjálftar mældust undir Vatnajökli í vikunni, svipaður fjöldi og vikuna á undan þegar þeir voru um 80. 17 skjálftar mældust í og við Öræfajökul, heldur færri en vikuna á undan og voru þeir allir undir einum að stærð. 23 skjálftar mældust í Bárðarbungu, mun færri en í síðustu viku og var stærsti skjálftinn 2,4 að stærð. Átta skjálftar mældust við Grímsvötn, sá stærsti 3,2 að stærð 23. nóvember kl 05:41, en það er stærsti skjálfti sem mælst hefur í Grímsvötnum síðan 2011. Sex skjálftar mældust við og austan við Hamarinn í Vatnajökli, sá stærsti 3,5 að stærð við vestari Skárftárketilinn þann 23 nóvember kl 21:37 og var hann jafnframt stærsti skjálfti vikunnar. Þrír djúpir skjálftar mældust þar sem berggangurinn úr öskju Bárðarbungu beygir til norðausturs og oft koma djúpir skjálftar. Um 17 skjálftar mældust að auki í bergganginum undir og fyrir framan Dyngjujökul. Fjórir smáskjálftar mældust við Öskju og tæplega 50 við Herðubreið og Herðubreiðartögl, flestir í lítilli hrinu 22. nóvember. Rúmlega 30 smáskjálftar mældust á víð og dreif norðan við Kverkjökul og Brúarjökul og tveir smáskjálftar í Kverkfjöllum. Fimm skjálftar mældust vestan og suðvestan við Langjökul, sá stærsti 1,4 að stærð.

Mýrdalsjökull

Níu skjálftar mældust undir Mýrdalsjökli í vikunni, svipaður fjöldi og í síðustu viku, sá stærsti 1,3 að stærð. Fimm smáskjálftar mældust á Torfajökulssvæðinu.

Jarðvakt