	Veðurstofa Íslands Jarðeðlissvið

Jarðskjálftar 20190128 - 20190203, vika 05

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Suðurland

Um 60 jarðskjálftar mældust á Suðurlandi þessa vikuna, um helmingi fleiri en vikuna á undan. 17 skjálftar mældust á víð og dreif á Suðurlandsbrotabeltinu, sá stærsti 1,2 að stærð. Rúmlega 40 skjálftar voru staðsettir á Hengilsvæðinu, þar af yfir 20 talsins í jarðskjálftarhrinu á 4 km dýpi við Hellisheiðarvirkjun þann 3. febrúar. Stærsti skjálftinn var 2,3 að stærð. Þrír skjálftar mældust við Ölkelduháls þann 29.janúar, sá stærsti 2,3 að stærð. Í Heklu varð einn skjálfti þann 3. febrúar, sá mældist 1,2 að stærð. 18 jarðskjálftar urðu í Reykjadal í Hrafntinnuskeri 28. og 31. janúar, sá stærsti 1,9 að stærð. Þann 31. janúar varð skjálfti af stærð 3,4 um 2 km NV af Surtsey, tilkynningar bárust Veðurstofunni um að skjálftinn hafi fundist í Heimey. 3 eftirskjálftar, af stærð 1,1 - 1,5, fylgdu í kjölfarið. Þann 29. janúar mældist skjálfti, 1,6 að stærð, tæplega 30 km suður af landi við Reynisdjúp.

Reykjanesskagi

Í þessari viku mældust 10 skjálftar á Reykjanesskaga, töluvert færri en vikuna á undan þegar að þeir voru 40 talsins. Fjórir þeirra voru við Fagradalsfjall um 5 km NA af Grindavík, sá stærsti 1,2 að stærð. Einnig voru 4, allir undir 1 að stærð, staðsettir í grennd við Kleifarvatn. Stakur skjálfti, 0,5 að stærð, var í Bláfjöllum þann 31. janúar. Á Reykjaneshrygg urðu fimm jarðskjálfar, stærstur var 1,9 að stærð, staðsettur um 40 km SV af Íslandi þann 31. janúar.

Norðurland

Um 40 jarðskjálftar mældust á Norðurlandi þessa vikuna, þar af um 30 á Tjörnesbrotabeltinu, sem er nær helmingi færri en vikuna á undan þegar að þeir voru um 65 talsins. Flestir skjálftanna urðu á Grímseyjarbeltinu, í Öxarfirði og við Grímsey. Stærsti skjálftinn var 1,8 að stærð í Skjálfandadjúpi. Einn skjálfti, 1,1 að stærð mældist við Siglufjörð. Fjórir skjálftar voru við Bæjarfjall, allir undir 1,0 að stærð og sjö skjálftar urðu við Kröflu, sá stærsti 1,4 að stærð. 10 skjálftar, 3,2 - 4,0 að stærð, mældust þann 2. janúar við Jan Mayen.

Hálendið

Tæplega 110 jarðskjálftar voru staðsettir á hálendinu í vikunni, töluvert fleiri en í síðustu viku þegar að þeir voru rúmlega 80 talsins. 12 skjálftar mældust við Herðubreið og Herðubreiðartögl og 8 við Öskju, þar af 3 á austurbrún öskjunar. Í Vatnajökli mældust 85 skjálftar og voru flestir þeirra staðsettir í Öræfajökli og í ganginum frá Bárðarbungu. Fjórfalt fleiri skjálftar mældust við Öræfajökul miðað við vikuna á undan, eða um 40 skjálftar. Skjálftarnir voru flestir nálægt yfirborð, um 0,2-1,0 að stærð og ýmist staðsettir SA eða NV megin í öskjunni. 9 smáskjálftar mældust við rætur og sporða Morsárjökuls. Í ganginum mældust 20 skjálftar, 13 þeirra voru staðsettir þar sem gangurinn beygir til norðausturs þar sem smáhrina varð 2. febrúar. Í Kverkfjöllum varð skjálfti 1,5 að stærð þann 2. janúar. Einn skjálfti, undir 1 að stærð, mældist í Grímsfjalli. Sjö skjálftar urðu við Dyngjuháls og einn 1,0 að stærð á Sprengisandi. Þann 29. janúar mældust 3 skjálftar við Langasjó, allir um 1,0 að stærð og annar stakur jarðskjálfti, undir 1 að stærð, mældist í Þjófahrauni.

Mýrdalsjökull

Átta skjálftar mældust undir Mýrdalsjökli í vikunni, sem er svipaður fjöldi og í vikunni á undan. Flestir þeirra voru staðsettir undir austurhluta jökulsins og voru allir undir 1,0 að stærð.

Jarðvakt