	Veðurstofa Íslands Jarðeðlissvið

Jarðskjálftar 20190225 - 20190303, vika 09

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Um 216 jarðskjálftar voru staðsettir með SIL-mælakerfi Veðurstofu Íslands í níundu viku ársins, heldur færri en vikuna á undan. Stærsti skjálfti vikunnar var þann 28. febrúar kl. 07:43 rúmlega 120 km norður af Kolbeinsey, 4,3 að stærð. Hann var hluti af hrinu sem varð 28. febrúar norður af Kolbeinsey en alls mældust 15 skjálftar stærri en 3 í þessari hrinu. Einn smáskjálfti mældist í Heklu en enginn í Eyjafjallajökli. Minni virkni var í Bárðarbungu, Öræfajökli og Kötlu en í síðustu viku.

Suðurland

Á suðurlandi mældust níu jarðskjálftar á tímabilinu, mun færri en í vikunni á undan. Enginn þeirra var á Hengilssvæðinu og einn smáskjálfti í Heklu. Stærsti skjálftinn var 1,4 að stærð, 28. febrúar.

Reykjanesskagi

Rúmlega 20 jarðskjálftar mældust á Reykjanesskaga í vikunni, svipaður fjöldi og vikuna á undan. Flestir voru við Fagradalsfjall eða 11 talsins. Tveir stærstu skjálftarnir voru 2 að stærð, annar við Fagradalsfjall og hinn við Svartsengi. Þrír skjálftar mældust við Bláfjöll, þrír við Svartsengi og tveir vestan við Bláa lónið. Þrír skjálftar mældust á Reykjaneshrygg og var sá stærsti um tveir að stærð.

Norðurland

Um 38 jarðskjálftar mældust á og úti fyrir Norðurlandi, flestir á Grímseyjarbeltinu. Þetta var svipaður fjöldi og í síðustu viku. Stærsti skjálftinn var um 1,7 að stærð 28. febrúar á Húsavíkur-Flateyjar misgenginu. Það voru einnig um 25 skjálftar við Kolbeinsey og voru 15 þeirra yfir 3 að stærð og þar af tveir yfir 4 og stærsti 4,3 en hann var jafnframt stærsti skjálfti vikunnar. Fimm skjálftar mældust við Kröflu og þrír við Þeistareyki.

Hálendið

Tæplega 50 jarðskjálftar mældust undir Vatnajökli í vikunni, talsvert færri en í síðustu viku. Virknin undir Öræfajökli var heldur minni en í fyrri viku eða rúmlega 10 skjálftar. Allir skjálftarnir voru undir einu stigi. Um 5 skjálftar voru í eða við Bárðarbungu og er það mun minni virkni en vikuna á undan. Allir skjálftarnir voru undir einu stigi. Um sex djúpir og fjórir grynnri smáskjálftar voru staðsettir, um 15 km austsuðaustur af Bárðarbungu, í bergganginum þar sem hann beygir til norðurs og álíka fjöldi í ganginum undir og framan við Dyngjujökul. Einn skjálfti mældist í Grímsvötnum, tæplega 2 að stærð. Tveir jarðskjálftar mældust norðan og austan við Tungnafellsjökul.
Tæplega 60 skjálftar (heldur færri en í síðustu viku) voru staðsettir á svæðinu norðan Vatnajökuls, þar af mældust um 20 við Öskju en 15 við Herðubreið og Herðubreiðartögl. Aðrir dreifðust í kringum Herðubreið og Herðubreiðartögl.
Þrír skjálftar mældust við Langjökul, sá stærsti af stærð um 1,8.

Mýrdalsjökull

Fimm jarðskjálftar voru staðsettir í Mýrdalsjökli, allir undir 1 að stærð og voru allir innan Kötluöskjunnar. Á Torfajökulssvæðinu mældust fimm skjálftar, stærsti 2,2 að stærð. Enginn jarðskjálfti mældist í Eyjafjallajökli í vikunni.

Jarðvakt