	Veðurstofa Íslands Jarðeðlissvið

Jarðskjálftar 20190304 - 20190310, vika 10

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Rúmlega 260 jarðskjálftar voru staðsettir með SIL-mælakerfi Veðurstofu Íslands í vikunni, nokkuð fleiri en vikuna á undan, þegar 216 mældust. Stærsti skjálfti vikunnar 4,1 að stærð þann 4. mars kl. 05:53, í sunnanverðri Bárðarbunguöskjunni. Stuttu fyrr mældist skjálfti 3,8 að stærð. Einn eftirskjálfti 3,3 að stærð mældist kl. 06:03. Einn smáskjálfti mældist í Heklu og einn í Eyjafjallajökli. Meiri virkni var í Bárðarbungu, en svipuð virkni var í Öræfajökli og Kötlu eins og í síðustu viku.

Suðurland

Á Suðurlandi mældust tæplega 30 jarðskjálftar á víð og dreif, mun fleiri en í vikunni á undan, þar sem 7 mældust. Rúmlega 25 smáskjálftar mældust á Hengilssvæðinu. Stærsti skjálftinn var 2,0 að stærð, 7. mars, um 15 km suður af Heklu.

Reykjanesskagi

Tæplega 15 jarðskjálftar mældust á Reykjanesskaga í vikunni, heldur færri en vikuna á undan, þegar 20 mældust. Skjálftarnir voru á víð og dreif og allir undir 1,5 að stærð. Um 10 skjálftar mældust á Reykjaneshrygg og var sá stærsti 1,8 að stærð.

Norðurland

Um 40 jarðskjálftar mældust á og úti fyrir Norðurlandi, flestir á Grímseyjarbeltinu. Þetta var svipaður fjöldi og í síðustu viku. Stærsti skjálftinn var 1,8 að stærð 5. mars við Eyjarfjarðardjúp. 10 smáskjálftar mældust við Kröflu og við Þeistareyki.

Hálendið

Rumlega 70 jarðskjálftar mældust undir Vatnajökli í vikunni, nokkuð fleiri en í síðustu viku, þegar 50 mældust. Virknin undir Öræfajökli var svipuð og í síðustu viku, rúmlega 10 skjálftar. Allir skjálftarnir voru undir einu stigi. Tæplega 20 jarðskjálftar mældust í Bárðarbungu, mun fleiri en vikuna á undan. Stærsti skjálfti vikunnar var 4,1 að stærð þann 4. mars kl. 05:53, í sunnanverðri Bárðarbunguöskjunni. Stuttu fyrr mældist skjálfti 3,8 að stærð. Nokkri eftirskjálftar mældust, sá stærsti 3,3 að stærð, kl. 06:03. Um sjö djúpir smáskjálftar voru staðsettir austsuðaustur af Bárðarbungu, í bergganginum þar sem hann beygir til norðurs og álíka fjöldi í ganginum undir og framan við Dyngjujökul. Sex skjálftar mældust í Grímsvötnum, sá stærsti tæplega 2 að stærð. Fimm smáskjálftar mældust austur af Hamrinum. Tæplega 40 skjálftar, nokkur færri en í síðustu viku, voru staðsettir á svæðinu norðan Vatnajökuls. Þar af mældust um 20 við Öskju, en 20 við Herðubreið og Herðubreiðartögl. Sá stærsti var 2,9 að stærð, þann 8. mars við Öskju. Engir skjálftar mældust við Langjökul.

Mýrdalsjökull

Fimm jarðskjálftar voru staðsettir í Mýrdalsjökli, allir undir 1 að stærð og voru flestir innan Kötluöskjunnar. Á Torfajökulssvæðinu mældust um 15 skjálftar, stærsti 1,5 að stærð. Einn smáskjálfti mældist í Eyjafjallajökli í vikunni.

Jarðvakt