	Veðurstofa Íslands Jarðeðlissvið

Jarðskjálftar 20190826 - 20190901, vika 35

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Tæplega 300 jarðskjálftar voru staðsettir, með SIL-mælakerfi Veðurstofu Íslands, í vikunni, um 70 færri en í fyrri viku. Jarðskjálftahrina var á Reykjaneshrygg. Stærsti skjálfti vikunnar var 30. ágúst kl. 01:15 á Reykjaneshrygg, 2,9 að stærð. Jarðskjálfti af stærð 2,5 var á Torfajökulssvæðinu þann 29. ágúst kl. 11:14. Ferðamenn á svæðinu töldu sig finna skjálftan

Suðurland

Svipaður fjöldi var staðsettur á Hengilssvæðinu (15) og í síðustu viku, allir undir tveimur stigum, og nokkrir smáskjálftar í Ölfusi. Um tveir tugir skjálfta mældust á Suðurlandsundirlendinu, þar af helmingurinn um 8km suðsuðaustur af Árnesi. Stærsti skjálftinn var rúm tvö stig og á því svæði. Einn smáskjálfti var í nágrenni Heklu.

Reykjanesskagi

Rúmlega 20 jarðskjálftar voru staðsettir á Reykjanesskaganum, mun færri en í síðustu viku þegar tæplega 90 skjálftar mældust á því svæði. Nokkrir skjálftar voru við Fagradalsfjall og Kleifarvatn en dreifðust að öðru leyti víðsvegar um skagann.
Fimmtíu jarðskjálftar mældust á Reykjaneshrygg, flestir í jarðskjálftahrinu sem hófst 29. ágúst kl. 21:14 og stóð fram undir kl. 02 þann 30. ágúst. Hrinan var um 9km vestsuðvestur af Geirfugladrangi. Tveir skjálftar voru um þrjú stig, báðir í lokin á hrinunni og voru þeir jafnframt stærstu skjálftar sem mældust í vikunni. Nokkrir smærri skjálftar mældust nær Reykjanestá.

Norðurland

Um 50 jarðskjálftar mældust á og úti fyrir Norðurlandi. Svipuð virkni var í Öxarfirði og vikuna á undan, um 15 skjálftar, allir um og innan við eitt stig. Tæpur tugur skjálfta mældist í Eyjafjarðaráli. Stærsti skjálftinn var 28. ágúst kl. 02:21, 2,7 að stærð. Nokkrir skjálftar voru staðsettir á Skjálfanda og rólegt var í Grímseyjarbeltinu. Nokkrir smáskjálftar mældust á svæðunum við Kröflu og Þeistareyki.

Hálendið

Tæplega 50 jarðskjálftar mældust undir Vatnajökli í vikunni. Nokkrir skjálftar mældust við Bárðarbungu og er það svipað og í fyrri viku. Allir skjálftarnir voru innan við tvö stig. Rúmlega tugur smáskjálfta mældist í ganginum undir Dyngjujökli og er það einnig svipaður fjöldi og vikuna á undan. Nokkrir smáskjálftar voru staðsettir við Grímsvötn og fáeinir á Lokahrygg. Svipuð virkni var við Öræfajökul í þessari viku og þeirri síðustu, nokkrir smáskjálftar.

Um 30 smáskjálftar mældust á svæðinu norður af Vatnajökli. Um helmingur við Öskju, aðrir á svæðinu við Herðubreið.

Mýrdalsjökull

Rólegt var í Mýrdalsjökli (13) líkt og undanfarnar vikur. Stærsti skjálftinn var við Goðabungu 30. ágúst kl 15:59, 1,9 að stærð. Flestir aðrir voru undir einu stigi.
Rúmlega tugur skjálfta mældist í Torfajökulsöskjunni. Stærsti skjálftinn var 2,5 að stærð, þann 29. ágúst kl. 11:14. Sá skjálfti var um þrjá km norður af Kaldaklofsjökli og um 5 km norðvestur af Torfajökli. Ferðamenn á svæðinu töldu sig heyra drunu og finna fyrir hreyfingu á svipuðum tíma.

Jarðvakt