	Veðurstofa Íslands Jarðeðlissvið

Jarðskjálftar 20191014 - 20191020, vika 42

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Um 570 jarðskjálftar voru staðsettir með SIL-mælakerfi Veðurstofu Íslands í vikunni, mun fleiri en í síðustu viku þegar rúmlega 200 jarðskjálftar voru staðsettir. Jarðskjálftahrina hófst norður af Mánáreyjum, norður af Tjörnesi, seinni part 19. október. Stærsti skjálfti vikunnar var 3,5 að stærð og var hann staðsettur í hrinunni úti fyrir Norðurlandi. Engir skjálftar voru staðsettir við Heklu.

Suðurland

Um 15 skjálftar mældust á Hengilssvæðinu, stærsti 2,5 að stærð. Nokkrir smáskjálftar voru staðsettir í Þrenslum. Rólegt var við Heklu.

Reykjanesskagi

Á annan tug skjálfta mældist á Reykjanesskaga, einkum vestan Kleifarvatns, mun færri en í fyrri viku. Stærsti skjálftinn var í nágrenni Krýsuvíkur, rúm tvö stig að stærð. Nokkrir skjálftar mældust á Reykjaneshrygg.

Norðurland

Rúmlega 400 jarðskjálftar hafa verið staðsettir undir og úti fyrir Norðurlandi í vikunni, flestir í jarðskjálftahrinu sem hófst seinni part laugardagins 19. október, skammt norður af Mánáreyjum (tæplega 30km vestnorðvestur af Kópaskeri). Þrír skjálftar voru yfir þremur stigum, allir þann 20. október. Sá fyrsti kl. 11:03, 3,2 að stærð, næsti kl. 19:19, 3,5 að stærð og sá síðasti kl. 22:21, 3,1 að stærð. Skjálftinn kl. 19:19 var jafnframt stærsti skjálfti vikunnar. Allnokkrir skjálftar voru yfir tveimur stigum. Ein tilkynning barst frá Húsavík um að fyrsti skjálftinn hefði fundist og önnur frá Akureyri um að stærsti skjálftinn hefði fundist þar. Hrinan er enn í gangi en virknin fór minnkandi upp úr miðnætti 21. október. Talsvert er enn óunnið af skjálftum úr hrinunni.
Rúmlega 20 jarðskjálftar voru innar í Öxarfirði. Stærsti var staðsettur um 13 kílómetra suðvestur af Kópaskeri, 2,2 stig að stærð. Tæplega 20 skjálftar voru á Skjálfanda, allir undir tveimur stigum.
Nokkrir smáskjálftar voru á svæðunum við Kröflu og Þeistareyki.

Hálendið

Tæplega 40 jarðskjálftar mældust undir Vatnajökli í vikunni, svipaður fjöldi og í fyrri viku. Við Bárðarbungu voru rúmlega 10 skjálftar staðsettir, álíka margir og vikuna á undan. Stærsti skjálftinn var tvö stig við norðvestanverðan öskjubarminn. Nokkrir litlir skjálftar mældust á svæðinu austur af Bárðarbungu, þar sem mælast gjarnan skjálftar á talsverðu dýpi. Fáeinir smáskjálftar mældust við Grímsvötn og rólegt var við Öræfajökul, líkt og undanfarnar vikur.
Fimmtán smáskjálftar voru við Öskju, litlu færri en í fyrri viku. Um 20 skjálftar voru við Herðubreið og Herðubreiðartögl, svipaður fjöldi og í síðustu viku. Stærsti skjálftinn, á þessu svæði, var vestur af Herðubreiðartöglum, 2,3 að stærð.
Einn skjálfti var við Eystri-Hagafellsjökul (í Langjökli), 1,7 að stærð og annar smáskjálfti skammt vestur af Sandvatni.

Mýrdalsjökull

Um 10 skjálftar voru í Mýrdalsjökli og er það svipaður fjöldi og undanfarnar tvær vikur. Einn skjálfti var innan Kötluöskjunnar, aðrir við Goðabungu. Allir skjálftarnir voru um og innan við eitt stig.

Jarðvakt