	Veðurstofa Íslands Jarðeðlissvið

Jarðskjálftar 20191028 - 20191103, vika 44

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Um 290 jarðskjálftar voru staðsettir með SIL-mælakerfi Veðurstofu Íslands í vikunni, heldur færri en í síðustu viku þegar um 350 jarðskjálftar voru staðsettir. Munar þar mestu um jarðskjálftahrinu á Tjörnesbrotabeltinu sem hófst 19. október skammt norður af Mánáreyjum og lauk 23. október. Stærstu skjálftar vikunnar voru 2,5 að stærð í Bárðarbungu 31. október kl 04:42 og við Langjökul 28. október kl 16:27. Einn smáskjálfti mældist í Heklu.

Suðurland

Rúmlega 20 smáskjálftar mældust á víð og dreif á Suðurlandsbrotabeltinu í vikunni, svipaður fjöldi og í síðustu viku. Á Hengilssvæðinu mældust 16 skjálftar, allir undir einum að stærð. Einn smáskjálfti mældist í Heklu í vikunni.

Reykjanesskagi

Rúmlega 40 jarðskjálftar mældust á Reykjanesskaga í vikunni, heldur fleiri en í síðustu viku þegar þeir voru um 30. Stærsti skjálftinn var 2 að stærð við Kleifarvatn. Sex skjálftar mældust á Reykjaneshrygg, sá stærsti 2,3 að stærð.

Norðurland

Rúmlega 30 jarðskjálftar mældust á Tjörnesbrotabeltinu í vikunni, miklu færri en vikuna á undan þegar um 150 jarðskjálftar voru mældir. Munar þar mestu um hrinu sem hófst 19. október skammt norður af Mánáreyjum og lauk 23. október. Stærsti skjálftinn var 1,7 að stærð á Húsavíkur-Flateyjar misgenginu, en alls mældust 13 skjálftar þar og 19 á Grímseyjarbeltinu. Tveir smáskjálftar mældust við Kröflu, tveir austur af Mývatni og fimm við Þeistareyki.

Hálendið

Tæplega 120 jarðskjálftar mældust undir Vatnajökli í vikunni, rúmlega helmingi fleiri en í vikunni á undan þegar um 50 skjálftar mældust. Þrettán skjálftar mældust í Bárðarbungu, svipaður fjöldi og í síðustu viku, sá stærsti 2,5 að stærð þann 31. október og var hann jafnframt annar af tveimur stærstu skjálftum vikunnar. Rúmlega 40 jarðskjálftar mældust ASA af Bárðarbungu á svæði þar sem oft mælast djúpir skjálftar og voru langflestir skjálftarnir á 15-20 km dýpi. Stærsti skjálftinn þar var 1,1 að stærð. Sjö skjálftar mældust í bergganginum undir og fyrir framan Dyngjujökul. Sextán skjálftar mældust við Öræfajökul og 15 við Grímsvötn, heldur fleiri en í síðustu viku. Ellefu skjálftar mældust norður af Esjufjöllum í smá hrinu 3. nóvember. Skjálftarnir voru allir undir einum að stærð.

Tveir skjálftar mældust við Öskju og átta við Herðubreið og Herðubreiðartögl, allir undir einum að stærð.

Tíu skjálftar mældust við Langjökul 28. og 29. október, sá stærsti 2,5 að stærð og var hann annar af tveimur stærstu skjálftum vikunnar.

Mýrdalsjökull

Átta skjálftar mældust undir Mýrdalsjökli, svipaður fjöldi og undanfarnar vikur. Þrír skjálftar mældust innan öskjunnar og fimm við Goðabungu. Sá stærsti var 1,6 að stærð við Goðabungu. Tveir skjálftar mældust undir Eyjafjallajökli, sá stærri 1 að stærð. Sex skjálftar mældust á Torfajökulssvæðinu, sá stærsti 1,9 að stærð 3. nóvember.

Jarðvakt