	Veðurstofa Íslands Jarðeðlissvið

Jarðskjálftar 20191216 - 20191222, vika 51

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Tæplega 1270 jarðskjálftar voru staðsettir með SIL mælakerfi Veðurstofu Íslands í vikunni, mun fleiri en í síðustu viku þegar um 900 skjálftar mældust. Munar mestu um jarðskjálftahrinu sem hófst sunnudaginn 15. desember og stóð í um fimm daga við Fagradalsfjall á Reykjanesi. Í vikunni mældust um 1110 skjálftar í hrinunni. Stærstu skjálftar vikunnar voru 3,5 að stærð 19. desember kl 11:20 og 3,0 að stærð 16. desember kl 01:03, báðir í hrinunni við Fagradalsfjall. Skjálftarnir fundust víða á suðvesturhorninu. Skjálfti 2,8 að stærð mældist um 4 km suðsuðvestur af Hellu 19. desember kl 10:47 og varð hans vart í Fljótshlíð. Minni eða svipuð virkni var á öllum svæðum í vikunni samanborið við síðustu viku, nema á Reykjanesi. Rólegt var í Bárðarbungu og Kötlu og enginn skjálfti mældist í Grímsvötnum og Heklu.

Suðurland

Rúmlega 20 skjálftar mældust á Suðurlandsbrotabeltinu í vikunni, mun færri en í síðustu viku þegar um 50 skjálftar mældust. Stærsti skjálftinn var 2,8 að stærð kl 10:47 þann 19. desember um 4 km suðsuðvestur af Hellu sem fannst í Fljótshlíð. Átta smáskjálftar mældust á Hengilssvæðinu, mun færri en í síðustu viku, en þá mældust þar um 20 skjálftar. Enginn skjálfti mældist í Heklu í vikunni.

Reykjanesskagi

Í vikunni mældust 1115 jarðskjálftar á Reykjanesskaga, lang flestir voru hluti af jarðskjálftahrinu sem hófst við Fagradalsfjall sunnudaginn 15. desember. Alls mældust um 1650 skjálftar í hrinunni, og var stærsti skjálftinn 3,7 að stærð á fyrsta degi hrinunnar. Alls mældust tíu skjálftar 3,0 eða stærri í hrinunni, átta þeirra fyrsta daginn. Stærsu skjálftar hrinunnar fundust víða á suðvestanverðu landinu. Stærsti skjálftinn sem mældist í hrinunni í vikunni var 3,5 að stærð fimmtudaginn 19. desember kl 11:20 og fannst hann víða á suðvesturhorninu. Skjálftinn var auk þess stærsti skjálfti vikunnar. Annar skjálfti 3,0 að stærð mældist í hrinunni þann 16. desember kl 01:03. Það fór að draga úr hrinunni 19 desember og var henni að mestu lokið þann 20. desember. Virknin var mest fyrstu tvo dagana, þann 15. og 16. desember. Níu skjálftar mældust á Reykjaneshrygg í vikunni, allir undir 2 að stærð.

Norðurland

Tæplega 30 jarðskjálftar mældust á Tjörnesbrotabeltinu í vikunni, svipaður fjöldi og í vikunni á undan. Flestir skjálftarnir, eða rúmlega 20 mældust á Grímseyjarbeltinu, allir undir 2 að stærð. Tíu smáskjálftar mældust um 10 km norðaustur af Þeistareykjum, einn við Bæjarfjall og þrír við Kröflu.

Hálendið

Þrjátíu og þrír skjálftar mældust undir Vatnajökli í vikunni, mun færri en vikuna á undan þegar tæplega 70 skjálftar mældust. Tveir skjálftar mældust í Bárðarbungu, sá stærri 2,2 að stærð, mun færri en í síðustu viku þegar þeir voru tæplega tugur. Tólf djúpir skjálftar mældust þar sem berggangurinn beygir til norðausturs undir Vatnajökli á svæði sem oft mælast djúpir skjálftar og einn sjálfti mældist í bergganginum undir Dyngjujökli. Enginn skjálfti mældist í Grímsvötnum. Einn skjálfti mældist í Þórðarhyrnu, einn við Hamarinn og tveir í Esjufjöllum. Ellefu smáskjálftar mældust í Öræfajökli. Sex smáskjálftar mældust við Öskju og rúmlega 20 við Herðubreið og Herðubreiðartögl. Fjórir skjálftar mældust við Langjökul.

Mýrdalsjökull

Þrír smáskjálftar mældust undir Mýrdalsjökli í vikunni, mun færri en í vikunni á undan, þegar um tugur skjálfta mældist. Enginn skjálfti mældist á Torfajökulssvæðinu í vikunni.

Jarðvakt