	Veðurstofa Íslands Jarðeðlissvið

Jarðskjálftar 20200608 - 20200614, vika 24

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Um 1580 jarðskjálftar voru staðsettir með SIL-mælakerfi Veðurstofu Íslands í síðustu viku, nokkuð fleiri en vikuna þar áður þegar þeir voru um 1200. Jarðskjálftahrina sem staðið hefur yfir frá 30. maí í nágrenni Grindavíkur er enn í gangi og jókst virkni þar töluvert þann 13. júní. Í síðustu viku mældust um 1200 jarðskjálftar á svæðinu þar af um 700 þann 13. júní. Þann dag mældist stærsti skjálfti vikunnar sem var 3,5 að stærð um 2 km norðan við Grindavík. Langflestir skjálftarnir sem mældust við Grindavík voru smáskjálftar, minni en 1,0 að stærð. Næststærsti skjálfti vikunnar var 3,4 að stærð og var staðsettur í Bárðarbunguöskjunni. Alls voru 20 skjálftar staðsettir þar í vikunni. Níu skjálftar voru staðsettir í Grímsvötnum, sá stærsti 1,4 að stærð. Tveir smáskjálftar mældust í Heklu þann 8. júní.

Suðurland

Tíu smáskjálftar voru staðsettir á Suðurlandsbrotabeltinu í vikunni, nokkuð færri en í síðustu viku þegar þeir voru 40. Tólf skjálftar mældust á Hengilssvæðinu, sá stærsti 1,4 að stærð við Húsmúla. Tveir smáskjálftar, 0,3 og 0,6 að stærð, mældust í Heklu þann 8. júní.

Reykjanesskagi

Alls mældust rúmlega 1300 jarðskjálftar á Reykjanesskaga í vikunni, þar af um 1200 í nágrenni Grindavíkur, en þar hefur staðið yfir jarðskjálftahrina frá því í lok maí. Virkni þar jókst tímabundið þann 13. júní en þá mældust um 700 jarðskjálftar þar. Þá mældist stærsti skjálfti vikunnar sem var 3,5 að stærð og varð hans vart í Grindavík. Sjö skjálftar stærri en 2,0 mældust einnig þann daginn og fannst hluti þeirra í Grindavík. Þessi jarðskjálftavirkni verður vegna kvikuinnskots í jarðskorpunni með miðju rétt vestan við fjallið Þorbjörn. Rétt rúmlega 100 skjálftar voru staðsettir vestast á Reykjanesskaga við Reykjanestá, sá stærsti 1,5 að stærð. Níu skjálftar á stærðarbilinu 0,9 til 1,5 voru staðsettir úti á Reykjaneshrygg í vikunni. Á svæðinu kringum Sveifluháls og Kleifarvatn voru staðsettir sautján smáskjálftar.

Norðurland

Tæplega 90 skjálftar voru staðsettir á Tjörnesbrotabeltinu í síðustu viku. Þar af voru um 30 þeirra staðsettir norðaustan við Grímsey þann 14. júní. Tuttugu skjálftar voru staðsettir í Öxarfirði, sá stærsti 2,2 að stærð. Aðrir skjálftar á Tjörnesbrotabeltinu dreifðu sér á Húsavíkur-Flateyjarmisgengið og Grímseyjarbeltið. Tíu smáskjálftar voru staðsettir í Kelduhverfi við ósa Jökulsár á Fjöllum, tveir við Þeistareyki og þrír við Kröflu.

Hálendið

Rúmlega 60 skjálftar voru staðsettir undir Vatnajökli í vikunni, fleiri en í síðustu viku þegar þeir voru 40. Þar af voru tuttugu skjálftar staðsettir í öskjunni í Bárðarbungu, sá stærsti 3,4 að stærð sem varð seinnipartinn 14. júní. Sá skjálfti var jafnframt næst stærsti skjálfti vikunnar. Átta djúpir jarðskjálftar mældust austan við Bárðarbungu og þrír smáskjálftar undir Dyngjujökli í bergganginum sem liggur að Holuhrauni. Á Lokahrygg mældust átta jarðskjálftar, sá stærsti 1,8 að stærð en aðrir minni en 1,0. Níu skjálftar urðu í Grímsvötnum og tveir nokkuð sunnan við þau, við Háubungu. Stærsti skjálfti vikunnar í Grímsvötnum var 1,4 að stærð. Við Þórðarhyrnu voru staðsettir tveir skjálftar og einn til viðbótar nokkuð vestar. Einn skjálfti varð ofarlega í Skeiðarárjökli og annar norðan Skaftafellsfjalla. Fjórir smáskjálftar mældust í Öræfajökli.

Fimmtán skjálftar urðu í Öskju og og 35 í kringum Herðubreið og Herðubreiðartögl. Það er nokkuð svipuð virkni og í síðustu viku á báðum svæðum.

Fimm skjálftar urðu við suðvestan við Langjökul, sá stærsti 2,3 að stærð í Þórisjökli og einn til viðbótar suðaustan við Langjökul, 1,4 að stærð. Þrír smáskjálftar mældust í austurhlíðum Skjaldbreiðar.

Mýrdalsjökull

Átta skjálftar voru staðsettir í Mýrdalsjökulsöskjunni, sá stærsti 1,4 að stærð. Stakur skjálfti að stærð 0,8 var staðsettur í austanverðum Eyjafjallajökli og annar stakur skjálfti í Reykjadölum í Torfajökulsöskjunni.

Jarðvakt