	Veðurstofa Íslands Jarðeðlissvið

Jarðskjálftar 20210104 - 20210110, vika 01

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Um 790 jarðskjálftar mældust með sjálfvirka SIL-mælakerfi Veðurstofu Íslands í liðinni viku, aðeins fleiri en í fyrri viku þegar um 700 jarðskjálftar mældust. Stærsti skjálfti vikunnar var 4,0 að stærð þann 10. janúar kl. 03:15 og mældist hann nokkrum kílómetrum norðan Grindavíkur. Einnig mældust tveir skjálftar af stærð 3,2 og 3,1 þann 7. janúar kl. 02:41 og 02:42 vestan Krýsuvíkur. Töluverð skjálftavirkni var á Reykjanesskaganum í vikunni. Um 40 skjálftar mældist í Mýrdalsjökli í vikunni, sex skjálftar í Grímsvötnum. Einn smáskjálfti mældist við Heklu í vikunni.

Suðurland

Rúmlega 40 jarðskjálftar voru staðsettir á Suðurlandi í vikunni og var stærsti skjálftinn 2,6 að stærð þann 10. janúar kl. 14:10 við Húsmúla á Hengilssvæðinu. Hann fannst af göngufólki á svæðinu. Um 25 skjálftar mældust til viðbótar á því svæði. Aðrir skjálftar voru undir tveimur og dreifðust um Suðurland, m.a. nokkrir skjálftar sem mældust sunnan við Hveragerði. Einn smáskjálfti mældist í Heklu og einn skjálfti mældist rétt norðan við Surtsey.

Reykjanesskagi

Um 520 skjálftar mældust á Reykjanesskaga í liðinni viku. Stærsti skjálftinn mældist 4,0 að stærð þann 10. janúar kl. 03:15, um fimm kílómetrum norðan við Grindavík. Þetta var jafnframt stærsti skjálfti vikunnar. Skjálftinn fannst víða á Reykjanesskaga og á Höfuðborgarsvæðinu. Rúmlega 220 smærri skjálftar mældust í nágrenni Grindavíkur. Einnig var talsverð virkni í Fagradalsfjalli og nágrenni. Þá var hrina skjálfta rétt vestan Krýsuvíkur, við Vigdísarvelli. Þar mældust tveir skjálftar af stærð 3,2 og 3,1 þann 7. janúar, kl. 02:41 og 02:42. Engar tilkynningar bárust um að þeir hafi fundist. Einnig mældust nokkrir skjálftar við Kleifarvatn. Á Reykjaneshrygg mældust tæplega 10 skjálftar, allir af stærðinni 2 eða minni.

Norðurland

Um 60 jarðskjálftar mældust á Norðurlandi í vikunni. Flestir skjálftanna voru á Grímseyjarbeltinu í Eyjafjarðarál. Stærsti skjálftinn var 2,8 að stærð þann 5. janúar kl. 10:48, í Eyjafjarðarál. Hann fannst á Siglufirði. Tveir skjálftar mældust við Kröflu og átta við Þeistareyki. Þessum til viðbótar mældust nokkrir skjálftar norður á Kolbeinseyjarhrygg.

Hálendið

Um 100 skjálftar mældust á hálendinu í liðinni viku. Norðan Vatnajökuls mældust tæplega 70 skjálftar, allir undir 1 að stærð. Virknin var bundin við nágrenni Öskju, Herðubreiðar og Herðubreiðartagla. Undir Vatnajökli mældust rúmlega 20 skjálftar. Sex skjálftar mældust í Bárðarbungu og var sá stærsti 1,9 að stærð. Tveir skjálftar mældust í bergganginum undir Dyngjujökli. Fimm skjálftar mældust á Lokahrygg. Við Grímsvötn mældust sex skjálftar. Einn skjálfti mældist í Tungnafellsjökli.

Um tugur skjálfta mældist í Langjökli, nokkrir í norðaustanverðum jöklinum og nokkrir í Geitlandsjökli. Nokkrir skjálftar mældust einnig sunnan Langjökuls, einn í Skjaldbreið, einn við Hlöðufell og tveir við Sandvatn. Tveir skjálftar mældust á Torfajökulssvæðinu.

Mýrdalsjökull

Tæplega 40 skjálftar mældust í Mýrdalsjökli í liðinni viku og var sá stærsti 1,7 að stærð. Flestir skjálftanna mældust innan Kötluöskjunnar en nokkrir mældust í Kötlujökli. Einn skjálfti mældist í Eyjafjallajökli.

Jarðvakt