	Veðurstofa Íslands Jarðeðlissvið

Jarðskjálftar 20210222 - 20210228, vika 08

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Yfir 11 þúsund jarðskjálftar mældust í liðinni viku með SIL-mælakerfi Veðurstofu Íslands en langflestir þeirra eru staðsettir á Reykjanesskaga þar sem öflug jarðskjálftahrina hefur staðið yfir frá 24. Febrúar. Búið er að fara handvirkt yfir rúmlega 1400 skjálfta. Í hrinunni hafa þrír skjálftar mælst 5,0 að stærð eða stærri. Sá stærsti varð kl. 10:05 að morgni 24. Febrúar og mældist 5,7 að stærð. Skjálftinn var staðsettur við NA enda Fagradalsfjalls og fannst víða á landinu en Veðurstofunni bárust tilkynningar víða af SV-landi, Snæfellsnesi, Vestfjörðum, Húnvatnssýslum og Suðurlandi austur að Vík og Vestmannaeyjum. Næst stærsti skjálftinn mældist á svipuðum stað og sá stærsti að morgni 27. Febrúar og var 5,2 að stærð.

Fjöldi annarra skjálfta varð þann 24. Febrúar á svæðinu frá Grindavík í vestri að Kleifarvatni í austri. Þeirra stærstir skjálfti af stærð 5,0 kl. 10:30 skammt N við Vigdísavarvelli og annar af stærð 4,8 í Kleifarvatni. Alls mældust 29 skjálftar að stærð 4,0 eða stærri eftir að hrinan hófst í þessarri viku. Í kjölfar stærstu skjálftanna varð grjóthrun í bröttum hlíðum á svæðinu og Vegagerðin hefur tilkynnt um sprungur í Suðurstrandar- og Grindavíkurvegi.

Suðurland

Á Hengilssvæðinu mældust fimm smáskjálftar í vikunni, sem er mun minna en í síðustu viku þegar þar var nokkur skjálftavirkni og mældust þá yfir 100 skjálftar.

Einnig mældust fimm skjálftar á Suðurlandsbrotabeltinu og voru þeir allir í kringum 1,0 að stærð. Þetta er aðeins minni virkni en í síðustu viku þegar þarna mældust 20 skjálftar. Enginn skjálfti mældist í Heklu í vikunni.

Reykjanesskagi

Öflug jarðskjálftahrina hófst á Reykjanesskaga þann 24. Febrúar. Í síðustu viku mældust þar hátt í 11 þúsund skjálftar með sjálfvirku staðsetningarkerfi Veðurstofunnar, af þeim hafa um 1300 skjálftar verið yfirfarnir handvirkt. Þegar þetta er skrifað (1. Mars) er enn mikil virkni á svæðinu. Nokkur smáskjálftavirkni hafði verið við SV-vert Fagradalsfjall þann 23. Febrúar og síðan NA-vert Fagradalsfjall morgunin 24. Febrúar. Kl. 10:05 þann 24. Febrúar varð síðan skjálfti af stærð 5,7 við NA-vert Fagradalsfjall. Í kjölfarið á þeim skjálfti varð mikil virkni á svæðinu á milli Grindavíkur og Kleifarvatns og urðu alls ellefu skjálftar á milli 4,0 og 5,0 að stærð á því svæði þann dag. Stærstir þeirra voru skjálfti af stærð 5,0 skammt norðan við Vigdísarvelli og annar af stærð 4,8 í Kleifarvatni, báðir skjálftarnir fundust greinilega á Höfuðborgarsvæðinu og víðar.

Eftir hádegi þann 24. Febrúar fram að hádegi 26. Febrúar minnkaði virkni í hrinunni og mældist enginn skjálfti yfir 4,0 á því tímabili en fimm á stærðarbilinu 3,0-4,0. Um hádegi 26. Febrúar jókst virknin aftur töluvert en þann dag mældust níu skjálftar yfir 4,0 að stærð, þeirra stærstur 4,9 kl. 22:38. Að morgni 27. Febrúar mældist skjálfti af stærð 5,2, sem var næststærsti skjálfti vikunnar. Sá var einnig staðsettur við norðurenda Fagradalsfjalls, en um 1,5 km vestan við upptök skjálftans sem var 5,7 að stærð. Virknin hélt áfram af svipuðum krafti þann 28. Febrúar en þá mældust 7 skjálftar yfir 4,0 stærð, tveir stærstu voru 4,7 að stærð staðsettir milli Fagradalsfjalls og Keilis.

Dagana 24.-28. Febrúar mældust yfir 180 skjálftar milli 3,0 og 4,0 að stærð, 26 skjálftar milli 4,0 og 5,0 að stærð og þrír yfir 5,0 að stærð. Almenningur hefur sent Veðurstofunni yfir eitt þúsund tilkynningar vegna þess að það fann fyrir skjálfta og Vegagerðin hefur tilkynnt um sprungur í Suðurstrandar- og Grindavíkurvegi.

Fjórir skjálftar rúmlega 2 að stærð voru staðsettir rétt utan við Reykjanestá og ellefu skjálftar á bilinu 1,6 til 2,5 að stærð voru staðsettir lengra út á Reykjaneshrygg meira en 35 km frá landi.

Norðurland

Á Tjörnesbrotabeltinu mældust um 60 skjálftar, nokkuð færri en í síðustu viku þegar þeir voru um 150. Tveir stærstu skjálftarnir voru 2,4 og 2,6 að stærð og voru staðsettir tæpa 20 km NA af Siglufirði. Fimmtán skjálftar voru staðsettir NA við Grímsey en þar hefur verið nokkur virkni undanfarið, en aðrir skjálftar í vikunni dreifðust nokkuð jafnt á Húsavíkur-Flateyjarmisgengið og Grímseyjarbeltið.

Stakur smáskjálfti mældist á Kröflusvæðinu og annar við Þeistareyki.

Hálendið

Samtals mældust 13 jarðskjálftar undir Vatnajökli í vikunni og dreifðust þeir á milli Bárðarbungu, Grímsvatna og Lokahryggs. Þetta er nokkuð minni virkni en í síðustu viku þegar þeir voru rúmlega 50 og þar af meirihlutinn djúpir skjálftar austur af Bárðarbungu. Í Bárðarbunguöskjunni mældust fimm skjálftar, sá stærsti 2,0 að stærð. Í og við Grímsvötn mældust fjórir skjálftar, sá stærsti 1,7 að stærð. Á Lokahrygg mældist stakur skjálfti að stærð 1,9 og annar stakur skjálfti að stærð 1,2 mældist í nágrenni við Þórðarhyrnu.

Enginn skjálfti mældist í Öskju en sex smáskjálftar mældust við Herðubreið og Herðubreiðartögl.

Tveir skjálftar af stærð 1,7 og 1,8 mældust í Hofsjökli í síðustu viku. Stakur skjálfti af stærð 2,0 varð í Þórisjökli og tveir smáskjálftar voru staðsettir við Högnhöfða sunnan Hlöðufells.

Mýrdalsjökull

Fimm skjálftar mældust í Mýrdalsjökli í vikunni, sá stærsti 2,6 að stærð þann 24. Febrúar. Það eru nokkuð færri skjálftar en í síðustu viku þegar þeir voru 20. Enginn skjálfti mældist á Torfajökulssvæðinu.

Jarðvakt