	Veðurstofa Íslands Jarðeðlissvið

Jarðskjálftar 20210405 - 20210411, vika 14

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Tæplega 1400 jarðskjálftar mældust í liðinni viku með SIL-mælakerfi Veðurstofu Íslands og hafa rúmlega 1050 þeirra verið yfirfarnir. Stærsti skjálfti vikunnar var 2,8 að stærð þann 7. apríl norðaustan við Grindavík. Eldgosið í Fagradalsfjalli stendur enn yfir og í liðinni viku bættust ný gosop við gígana í Geldingadölum þann 5., 6. og 10. apríl. Mesta skjálftavirknin í liðinni viku var á Reykjanesskaga þar sem rúmlega 1000 skjálftar mældust. Um 30 skjálftar mældust í Mýrdalsjökli og 30 í Bárðarbungu. Fimm skjálftar mældust við Grímsvötn.

Suðurland

Um 90 jarðskjálftar mældust á Suðurlandi í liðinni viku. Stærsti skjálftinn var 2,4 að stærð kl. 5:58 þann 10. apríl, rétt austan við Selfoss. Hann fannst í næsta nágrenni. Flestir skjálftanna voru á Hengilssvæðinu, aðallega í Húsmúla og nokkrum kílómetrum vestan við Hengilinn. Nokkrir skjálftar mældust í Þrengslunum og nokkrir á Suðurlandsbrotabeltinu.

Reykjanesskagi

Um 1040 jarðskjálftar mældust á Reykjanesskaga í liðinni viku og hafa um 740 þeirra verið yfirfarnir. Um 450 skjálftar voru staðsettir í kvikuganginum sem liggur frá Keili suður í Nátthaga, flestir í norðanverðum ganginum. Eldgosið í Geldingadölum stendur enn yfir og ný gosop bættust við norðaustur af fyrri gígum. Þau opnuðust þann 5., 6. og 10. apríl.

Um 50 skjálftar mældust í nágrenni Reykjanestáar, allir undir 2 að stærð. Um 160 skjálftar mældust í nágrenni Grindavíkur, sá stærsti var 2,8 að stærð þann 7. apríl kl. 12:34 rétt austan við Sýlingarfell. Hann fannst í Grindavík. Allnokkrir skjálftar mældust austur að Kleifarvatni og nokkrir skjálftar dreifðust yfir Brennisteinsfjalla- og Bláfjallasvæðið. Tveir skjálftar mældust úti á Reykjaneshrygg.

Norðurland

Á Norðurlandi mældust um 70 skjálftar, flestir á Grímseyjarbeltinu. Stærsti skjálftinn var 2,2 að stærð rétt norðaustan við Grímsey. Nokkrir skjálftar mældust á Húsavíkur-Flateyjarmisgenginu og Eyjafjarðarál. Einnig mældust nokkrir litlir skjálftar norðan við Hrísey. Tveir skjálftar mældust við Þeistareyki og fjórir við Kröflu.

Hálendið

Tæplega 110 skjálftar mældust á hálendinu í liðinni viku. Rúmlega 60 skjálftar mældust í Vatnajökli, allir undir 2 að stærð. Þar af voru tæplega 30 í Bárðarbungu og 6 djúpir skjálftar austan við Bárðarbungu. Við Grímsvötn mældust um 5 skjálftar og einn á Lokahrygg. Rúmlega 10 smáskjálftar mældust í og við Öræfajökul. Norðan Vatnajökuls mældust rúmlega 40 skjálftar, allir undir 2 að stærð. Við Öskju mældust rúmlega 20 skjálftar og tæplega 20 í nágrenni Herðubreiðar og Herðubreiðartagla.

Einn skjálfti mældist í Þórisjökli og einn í Hofsjökli. Þrír skjálftar mældust sunnan Langjökuls. Þrír skjálftar mældust í Torfajökli.

Mýrdalsjökull

Tæplega 30 skjáfltar mældust í Mýrdalsjökli í vikunni, sá stærsti var 2,2 að stærð þann 6. apríl. Flestir voru innan Kötluöskjunnar. Einnig mældust nokkrir djúpir skjálftar nokkrum kílómetrum suðaustan við Hjörleifshöfða. Það hefur gerst á nokkurra ára fresti.

Jarðvakt