	Veðurstofa Íslands Jarðeðlissvið

Jarðskjálftar 20210419 - 20210425, vika 16

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Um 1200 jarðskjálftar mældust með sjálfvirka SIL-mælakerfi Veðurstofu Íslands í liðinni viku, heldur fleiri en í fyrri viku þegar tæplega 1000 jarðskjálftar mældust. Búið er að yfirfara tæplega 740 skjálfta. Stærsti skjálftinn mældist 4,1 að stærð þann 20. apríl kl. 23:05 um 2,7 km ANA af Þorbirni. (norðaustur af Sundhnúk). Við Grímsvötn mældust 14 skjálftar, sá stærsti 2,4 að stærð og 10 smáskjálftar í Öræfajökli. Um 30 djúpir smáskjálftar mældust austan við Bárðarbungu. Einn smáskjálfti mældist við Heklu.

Suðurland

Um 90 jarðskjálftar mældust á Suðurlandi í vikunni, þar af hafa 70 verið yfirfarnir, stærsti skjálftinn 2,5 að stærð mældist þann 19. apríl kl. 21:12 við Nesjavallaleið. Flestir skjálftanna voru í hrinu við Nesjavallaveg, vestan Dyrafjalla, á sunnanverðri Mosfellsheiði. Einnig mældust nokkrir skjálftar á Hengilssvæðinu, í Þrengslunum og við Raufarhólshelli. Stöku skjálftar mældust á Suðurlandsbrotabeltinu og einn smáskjálfti norðaustur af Heklu.

Reykjanesskagi

Tæplega 900 skjálftar mældust á Reykjanesskaga í liðinni viku, þar af hafa rúmlega 500 verið yfirfarnir. Stærsti skjálftinn mældist 4,1 að stærð þann 20. apríl kl. 23:05 norðaustur af Sundhnúk, u.þ.b. 2,7km austnorðaustur af Þorbirni. Þetta var jafnframt stærsti skjálfti vikunnar. Mesta virkni var á því svæði, eða um 270 jarðskjálftar. Mikill virkni var í bergganginum á milli Keilis og Litla-Hrúts þar sem um 160 skjálftar mældust, stærsti skjálftinn 2,4 að stærð, þann 21. apríl kl. 23:04. Mikill virkni var við suðvestur enda Kleifarvatns, þar sem yfir 110 jarðskjálftar mældust. Sá stærsti þar varð 24. apríl kl 11:38, 3,1 að stærð og kl. 12:32 3,0 að stærð. Aðrir skjálftar dreifðust frá Reykjanestá austur að Suðurlandsvegi. Nokkrir smáskjálftar mældust við Brennisteinsfjöll, sá stærsti 1,7 að stærð. Um 20 skjálftar mældust á Reykjaneshrygg, nokkra kílómetra frá landi. Stærsti skjálftinn var 2,7 að stærð.

Norðurland

Um 60 jarðskjálftar mældust á Norðurlandi í vikunni, þar af um 40 yfirfarnir, yfir helmingur þeirra var á Húsavíkur-Flateyjarmisgenginu. Stærsti skjálftinn á Norðurlandi var af stærð 2,0 þann 22 apríl kl. 10:26 um 17 km norðnorðaustur af Ólafsfirði. Tæplega 10 jarðskjálftar mældust í Öxarfirði og nokkrir austur og norðaustur af Grímsey. Sex smáskjálftar mældust við Kröflu og Reykjahlíð.

Hálendið

Rúmlega 140 jarðskjálftar mældust á hálendinu í liðinni viku, þar af um 110 yfirfarnir. Undir Vatnajökli mældust um 110 skjálftar. Um 30 skjálftar mældust í Bárðarbunguöskjunni, sá stærsti 2,1 að stærð. Rúmlega 30 skjálftar mældust austan Bárðarbungu þar sem oft mælast djúpir skjálftar. Nokkrir smáskjálftar mældust í Dyngjujökli. Við Grímsvötn mældust 14 skjálftar, sá stærsti 2,4 að stærð, þann 25. apríl kl.13:21, flestir voru staðsettir í suðurenda Grímsfjalls. Einn smáskjálfti mældist austur af Hamrinum. 10 smáskjálftar mældust í Öræfajökli. Norðan Vatnajökuls mældust tæplega 30 smáskjálftar. Mesta virknin var bundin við Herðubreið og Herðubreiðartögl. Einn skjálfti mældist við Tungnafellsjökul, einn í Hofsjökli og einn í Langjökli.

Mýrdalsjökull

Um 10 smáskjálftar mældust í Mýrdalsjökli í liðinni viku og var sá stærsti 0.5 að stærð. Flestir skjálftanna mældust innan Kötluöskjunnar og vestur af Kötlujökli. Tveir smáskjálftar mældust í Eyjafjallajökli og fjórir á Torfajökulssvæðinu.

Jarðvakt