	Veðurstofa Íslands Jarðeðlissvið

Jarðskjálftar 20210524 - 20210530, vika 21

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Rúmlega 230 jarðskjálftar mældust með SIL-mælakerfi Veðurstofu Íslands í vikunni, litlu færri en í fyrri viku þegar þeir voru um 270. Stærsti skjálftinn á landinu var við Brennisteinsfjöll 24. maí kl. 21:36, 3,4 að stærð. Hann fannst á höfuðborgarsvæðinu. Enn dregur úr skjálftavirkni við gosstöðvarnar í Geldingadölum.

Suðurland

Fáeinir skjálftar mældust á Hengilssvæðinu og Suðurlandsundirlendi. Stærsti var 29. maí kl. 19:12, skammt vestan við Vörðufell, 2,0 að stærð. Einn smáskjálfti var staðsettur skammt suðaustur af Heklu.

Reykjanesskagi

Um 90 jarðskjálftar mældust á Reykjanesskaganum sem er svipuð virkni og í liðinni viku. Á annan tug skjálfta mældist vestast á skaganum, við Reykjanestá, allir innan við tvö stig. Á svæðinu norður af gosstöðvunum þ.e. milli Litla-Hrúts og Keilis mældust 40 skjálftar, flestir í smáhrinu sem varð aðfaranótt fimmtudagsins 27. maí. Stærsti skjálftinn, 2,7 að stærð, varð í upphafi þeirrar hrinu. Tæplega 20 skjálfar voru staðsettir á svæðinu frá Núpshlíðarhálsi í vestri að Kleifarvatni í austri, allir litlir. Rúmlega 10 skjálftar mældust við Brennisteinsfjöll. Stærsti skjálftinn varð 24. maí kl. 21:36, 3,4 að stærð og fannst á höfuðborgarsvæðinu. Þetta var jafnframt stærsti skjálfti vikunnar.

Norðurland

Tæplega 50 jarðskjálftar mældust úti fyrir Norðulandi, heldur fleiri en í síðustu viku. Flestir skjálftar urðu fyrir mynni Eyjafjarðar og í Öxarfirði. Allir skjálftar voru um og innan við tvö stig. Tæpur tugur smáskjálfta mældist við Kröflu og Þeistareyki.

Hálendið

Um 30 skjálftar mældust undir Vatnajökli, 10 færri en í fyrri viku. Fáeinir skjálftar voru staðsettir við Bárðarbungu, stærsti 2,0 að stærð. Nokkrir skjálftar voru á Lokahrygg, stærsti 2,3 að stærð og var það stærsti skjálftinn í jöklinum þessa vikuna. Nokkrir smáskjálftar mældust við Grímsfjall, í Öræfajökli og Dyngjujökli.
Um 20 smáskjálftar voru við Öskju, Herðubreið og Herðubreiðartögl.

Mýrdalsjökull

Innan Kötluöskjunnar mældust 16 skjálftar, litlu færri en í fyrri viku, allir um og innan við eitt stig.

Jarðvakt