	Veðurstofa Íslands Jarðeðlissvið

Jarðskjálftar 20210607 - 20210613, vika 23

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Rúmlega 380 jarðskjálftar mældust í liðinni viku með SIL-mælakerfi Veðurstofu Íslands, sem er heldur meira en í síðustu viku þegar um 300 skjálftar mældust. Stærstu skjálftar vikunnar mældust langt úti fyrir landi. Fyrst þann 9. júní á Reykjaneshrygg hann var af stærð 3,5 og degi síðar var skjálfti við Kolbeinsey 3,2 að stærð. Eldgosið í Fagradalsfjalli stendur enn yfir en púlsavirknin virðist hafa stoppað í bili en nú er óróinn orðinn samfelldur á ný og virðist vella stöðugt úr gígnum. Þann 11.júní mældist flatarmál hraunsins 3,23 km² og flæðið 11,9 m³/s. Tæplega 40 skjálftar mældust í Öxarfirði og um 15 skjálftar mældust í Bárðarbungu og um 20 djúpir skjálftar austan við Bárðarbungu.

Suðurland

Rúmlega 35 jarðskjálftar mældust á Suðurlandi í liðinni viku, allir undir 2 að stærð. Rúmlega 10 skjálftar mældust syðst á Mosfellsheiðinni rétt norðan við Nesjavallaveg. Stærsti skjálfti vikunnar á suðurlandi mældist 1.8 að stærð í Árnesi.

Reykjanesskagi

Um 120 skjálftar mældust á Reykjanesskaga í liðinni viku. Stærsti skjálftinn mældist 8.júní af stærð 2,5 við Reykjanestá en alls mældust um 25 skjálftar þar. Nokkrir skjálftar mældust suður af Sandfellshæð og var sá stærsti 2,4 að stærð. Annar skjálfti af stærð 2,4 mældist milli litla Hrúts og Keilis en alls mældust um 35 skjálftar á sama svæði. Tveir skjálftar mældust í nágrenni við Brennisteinsfjöll báðir um rétt um 1 að stærð. Hraunflæðið úr gígnum tók breytingum í vikunni. Þann 10 júní breyttist virknin í um sólarhring þar sem kaflaskipt virkni hætti og tók að flæða stöðugt úr gígnum. Eftir þann sólarhing hófst aftur púlsa virknin með tilheyrandi sjónarspili. Þann 11. júní mældist flatarmál hraunsins 3,23 km2 og flæðið 11,9 m3/s.

Þrír skjálftar mældust á Reykjaneshrygg, sá stærsti mældist 2,2 að stærð um 65 km SV af Reykjanestá.

Norðurland

Á Norðurlandi mældust rúmlega 90 skjálftar þarf af voru um 15 þeirra á landi. Um 4 skjálftar mældust við Kröflu allir undir 1 að stærð. Þá mældust um 6 skjálftar við Þeistareyki, sá stærsti var 1 að stærð. Um tveir skjálftar mældust við Húsavík. Sá stærri var 1,5 að stærð þann 12.júní. Einn skjálfti mældist austan Varmahlíðar. Um 4 skjálftar mældust norðan Kolbeinsey þann 10.júní og mældist stærsti skjálftinn 3,2 að stærð. Flestir skjálftar mældust í Öxarfirði eða um 40 skjálftar. Stærstur þeirra mældist þann 9. júní og var 2,9 að stærð. Tæplega 5 skjálftar mældust við Grímsey og um 10 skjálftar á Eyjafjarðarál. Rúmur tugur skjálfta mældust á Húsavíkur og Flateyjarmisgenginu. Stærsti mældist þann 13. júní og var hann 2,1 að stærð.

Hálendið

Rúmlega 115 skjálftar mældust á hálendinu í liðinni viku. Um 65 skjálftar mældust í Vatnajökli, allir undir 2,5 að stærð. Þar af voru tæplega 15 í Bárðarbungu og rúmlega 20 djúpir skjálftar austan við Bárðarbungu. Við Grímsvötn mældust 6 skjálftar og sá stærsti mældist 9 km norðan Grímsvötn og var hann 1,7 að stærð.Tvær skjálftar mældust við Eystri Skaftárketlinn þann 10. júní, sá stærri mældist 2,4 að stærð. Tveir smá skjálftar mældust í Öræfajökli. Norðan Vatnajökuls mældust rúmlega 50 skjálftar, allir undir 2 að stærð. Við Öskju mældust um 10 skjálftar og um 40 í nágrenni Herðubreiðar og Herðubreiðartagla.

Mýrdalsjökull

Tæplega 5 skjáfltar mældust í Mýrdalsjökli í vikunni, sá stærsti var 1,8 að stærð þann 11. júní í austanverði Kötluöskjunni. Einn skjálfti mældist á Torfajökulssvæðinu af stærð 0,8.

Jarðvakt