	Veðurstofa Íslands Jarðeðlissvið

Jarðskjálftar 20220425 - 20220501, vika 17

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Um 1400 skjálftar voru staðsettir í vikunni með SIL-mælakerfi Veðurstofu Íslands. Síðustu þrjár vikur hefur skjálftavirknin náð vel yfir 1000 skjálfta og telur þar mest skjálftavirkni á Reykjanesskaga sem hefur verið áberandi í skjálftavirkni síðustu vikna. Af þessum 1400 skjálftum hafa um 700 verið yfirfarnir handvirkt. Meginhluti óyfirfarinna skjálfta eru smáskjálftar á Reykjanesskaga í nágrenni við Þorbjörn og Eldvörp. Mesta virkni vikunnar var virknin á Reykjanesi sem dreifði sé nokkuð víða en var þétt við Þorbjörn, Eldvörp, Sundhnjúkagíga, við Kleifarvatn og nærri Trölladyngju. Einnig má nefna smáskjálftavirkni í Öxarfirði og austan Grímseyjar auk skjálftavirkni við Herðubreiðartögl.

Stærsti skjálfti í vikunni var 3,4 að stærð, 30. apríl í suðurhluta Langjökuls og varð hans vart í Haukadal. Einn skjálfti mældist í Heklu í vikunni.

Suðurland

Rúmlega 20 skjálftar mældust á Hengilssvæðinu. Þar mældist stærsti skjálftinn 1,7 að stærð við Nesjavallaleið. Á Suðurlandsbrotabeltinu mældust 30 skjálftar, þar af flestir í Vatnafjöllum eða um 10. Einn skjálfti mældist í Heklu og var undir 0 að stærð.

Reykjanesskagi

Yfir 1100 skjálftar mældust á Reykjanesskaga í síðustu viku. Mesta virknin var vestan Fagradalsfjalls og út að Reykjanestá. Stærsti skjálfti vikunnar á svæðinu var 3,0 að stærð við Sandfellshæð norðan Eldvarpa. Gera má ráð fyrir að hægviðri á Suðvesturhorninu í vikunni hafi aukið næmni mælakerfisins á svæðinu sem ráði nokkru um þann mikla fjölda smáskjálfta sem mældust.

Úti fyrir Reykjanesi mældust á þriðja tug skjálfta, flestir um 70 km úti á Reykjaneshrygg.

Vesturland

Tveir skjálftar mældust rétt norðan við Grjótárvatn á Mýrum og fimm skjálftar í Langjökli, þar af stærsti skjálfti vikunnar sem var 3,4 að stærð.

Norðurland

Við Kröflu mældust 10 skjálftar, 5 við Bæjarfjall og einn SV af Ásbyrgi.

Rúmlega 100 skjálftar mældust á Tjörnesbrotabeltinu og ber þar helst að nefna virkni á Grímseyjarbeltinu. Rúmlega 20 skjálftar mældust austan við Grímsey og um 50 í Öxarfirði.

Hálendið

Í Vatnajökli mældust tæplega 30 skjálftar. Þar af mældust sex skjálftar í Grímsvötnum, sá stærsti af stærð 1,5. 5 skjálftar mældust við Skaftárkatla. Þrír skjálftar mældust í Bárðarbungu, þrír í Kverkfjöllum, einn á djúpa svæðinu.

Í Herðubreið og Herðubreiðartöglum mældust tæplega 50 skjálftar, flestir um eða undir 1,5 að stærð en sá stærsti var af stærð 2,2 og tæplega 10 skjálftar mældust í og við Öskju og var stærsti skjálftinn þar 1,8 að stærð.

Mýrdalsjökull

Átta skjálftar mældust í og við Kötluöskjuna í vikunni og tveir á Torfajökulsvæðinu, sá stærsti var 2,8 að stærð þann 1. maí.

Nánar er hægt að skoða skjálftavirkni á landinu í Skjálfta-Lísu

Jarðvakt