	Veðurstofa Íslands Jarðeðlissvið

Jarðskjálftar 20220509 - 20220515, vika 19

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Yfir 4000 jarðskjálftar mældust með SIL-kerfi Veðurstofu Íslands í liðinni viku. Af þeim hafa rúmlega 1300 skjálftar verið yfirfarnir. Stærsti skjálfti vikunnar var 4,8 að stærð kl. 16:56 þann 14. maí í Þrengslunum. Hann fannst víða á suðvesturhorni landsins. Á Reykjanesskaga var talsverð skjálftavirkni og í vikunni voru nokkrar skammvinnar hrinur með allnokkrum skjálftum yfir 3 að stærð. Stærstu skjálftarnir voru 4,3 og 4,2 að stærð í Eldvörpum í hrinu sem hófst þann 15. maí. Gervitunglamyndir og aflögunargögn benda til kvikuinnskots við Þorbjörn og er enn mikil skjálftavirkni í nágrenni hans. Þann 10. maí mældist skjálfti af stærðinni 3,2 austan við Grímsey. Sex skjálftar mældust í Bárðarbungu og einn í Öræfajökli.

Suðurland

Um 60 skjálftar mældust á Suðurlandi í liðinni viku. Stærsti skjálftinn var 4,8 að stærð þann 14. maí kl. 16:56 í Þrengslunum. Hann fannst víða á suðvesturhorni landsins, allt norður í Búðardal og austur í Fljótshlíð. Um 30 eftirskjálftar mældust eftir þennan skjálfta. Nokkrir skjálftar mældust á Hengilssvæðinu og tveir smáskjálftar í Vatnafjöllum. Flestir aðrir skjálftar dreifðust um Suðurlandsbrotabeltið.

Reykjanesskagi

Um 3700 skjálftar mældust á Reykjanesskaga í liðinni viku og búið er að yfirfara um 1040 af þeim. Landris mælist nú við Þorbjörn og bendir allt til þessa að kvikuinnskot sé nú að leita sér rúms á sömu slóðum og innskotin þar 2020. Jarðskjálftavirkni var víða á skaganum; fyrst stóð yfir hrina norðan Reykjaness þann 10. maí. Í henni mældust um 35 skjálftar og voru tveir þeirra yfir 3 að stærð. Þann 13. maí stóð yfir hrina við Reykjanestá. Í henni mældust um 65 skjálftar og voru fimm þeirra yfir 3 að stærð. Þann 15. maí hófst svo hrina í Eldvörpum. Búið er að yfirfara um 160 skjálfta í henni en sú virkni stendur enn yfir. Tíu skjálftar mældust yfir 3 að stærð og voru stærstu skjálftarnir 4,3 og 4,2 að stærð. Þeir fundust á Reykjanesskaganum og á höfuðborgarsvæðinu. Einnig var mikil smáskjálftavirkni frá Grindavík að Sundhnúkagígum. Þyrpingar nokkurra skjálfta mældust einnig víða á skaganum. Milli Bláfjalla og Lambafellshálss mældust um 85 skjálftar þann 15. maí en þeir tengjast skjálftanum í Þrengslunum.

Rúmlega 20 skjálftar mældust á Reykjaneshrygg í vikunni, sá stærsti var um 2,8 að stærð.

Norðurland

Tæplega 100 skjálftar mældust á Tjörnesbrotabeltinu í síðustu viku, flestir á Grímseyjarbeltinu þar sem tæplega 90 skjálftar mældust. Stærsti skjálftinn var 3,2 að stærð þann 10. maí kl. 04:40 um 14 km. austan við Grímsey en þar varð hrina um 60 skjálfta.

Við Kröflu mældust fjórir skjálftar og þrír við Þeistareyki.

Vesturland

Rúmlega 20 jarðskjálftar mældust á Vesturlandi í vikunni sem leið. Enn virðist vera virkni vestan við Ok en þar mældust um 10 skjálftar. Um 35 km. vestan við Snæfellsnes mældist um tugur skjálfta. Tveir skjálftar mældust í Högnhöfða og tveir í Hvítársíðu.

Hálendið

Í Vatnajökli mældust tæplega 50 skjálftar. Þar af mældust tíu skjálftar í Grímsvötnum, sá stærsti af stærð 1,4. Sjö skjálftar mældust á Lokahrygg. Sex skjálftar mældust í Bárðarbungu sá stærsti af stærð 2,6. Nokkrir djúpir smáskjálftar mældust austan við hana. Um 15 skjálftar mældust í ofanverðum Skeiðarárjökli. Einn skjálfti mældist í Kverkfjöllum og einn í Öræfajökli.

Norðan Vatnajökuls mældust um 20 skjálftar, allir undir 1,5 að stærð. Um helmingur þeirra mældist við Öskju, hinir dreifðust um nágrenni Herðubreiðar, Herðubreiðartagla og Upptyppinga.

Mýrdalsjökull og Torfajökulssvæðið

Aðeins mældust tveir skjálftar í Mýrdalsjökli í liðinni viku, einn smáskjálfti innan öskjunnar og einn í sunnanverðum jöklinum. Einn skjálfti mældist í Torfajökli. Hann var 1,6 að stærð.

Jarðvakt