	Veðurstofa Íslands Jarðeðlissvið

Jarðskjálftar 20220919 - 20220925, vika 38

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Suðurland

Um það bil 23 skjálftar mældust á Suðurlandi í síðustu viku, sem er aðeins færri en í vikunni þar á undan þegar að um 40 skjálftar mældust. Þeir voru nokkuð dreifðir um suðurlandið. Nokkrir skjálftar mældust við Raufarhólshelli, í kringum Ingólfsfjall og einn smáskjálfti suðvestur af Heklu.

Reykjanesskagi

Á Reykjanesskaga mældust rúmlega um 205 jarðskjálftar sem er færri en í síðustu viku þegar um 320 skjálftar mældust. Virknin var nokkuð dreifð um skagann en um 55 smáskjálftar mældust á milli Keilis og Fagradalsfjalls, stærsti skjálftinn þar mældist 2 að stærð. Þá mældust um 30 smáskjálftar við Eldvarparhraun og um 70 skjálftar vestur af Kleifarvatni.

Um 40 skjálftar mældust á Reykjaneshrygg í vikunni, en smá hrina varð þann 25.september. Stærsti skjálftinn mældist 2,5 að stærð þann 25. september.

Norðurland

Alls mældust um 730 skjálftar við Grímey í síðastliðinni viku í hrinu sem byrjaði þann 8. september, af þeim er búið að yfirfara um 250 skjálfta. Þetta eru mun færri en í síðustu viku þegar um 6200 skjálftar mældust. Stærsti skjálftinn mældist þann 19. september og reyndist hann vera 3.2 að stærð. Örfáir skjálftar eru að mælast núna en hrinunni er að mestu lokið. Um 10 skjálftar mældust í Öxarfirði og nokkrir á Húsavíkur og Flateyjarmisgenginu.

Við Kröflu mældust fimm smáskjálftar. Einn skjálfti mældist norður af Hauganesi, einn við Kötlubrúnir og einn norðvestur af Langavatni.

Hálendið

Í heildina mældust um 37 jarðskjálftar á hálendinu, sem er um helmingi færri en í vikunni á undan. Um 18 jarðskjálftar mældust í Vatnajökli, þar af tveir í Bárðarbungu, sá stærri af stærðinni 2,1 þann 21. september. Um sex skjálftar mældust við Skaftárkatlana, fjórir í kringum Grímsfjall, tveir á djúpasvæðinu og þrír í Skeiðarárjökli.

Um 10 skjálftar mældust við Öskju, sá stærsti 1,6 að stærð. Þrír smáskjálftar mældust í kringum Herðubreið. Einn skjálfti mældist við Frambruna og einn austur af Ketilhyrnu. Þrír skjálftar mældust norðaustur af Langjökli, sá stærsti 2 að stærð þann 23.september. Tveir skjálftar mældust suður af Hagavatni.

Mýrdalsjökull

Tæplega 20 jarðkjálftar mældust í Mýrdalsjökli í liðinni viku, flestir innan öskjunnar. Stærsti skjálftinn mældist 2,7 að stærð þann 20. september. Fimm skjálftar mældust á Torfajökulssvæðinu.

Jarðvakt