	Veðurstofa Íslands Jarðeðlissvið

Jarðskjálftar 20050808 - 20050814, vika 32

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Í vikunni mældist 171 skjálfti og 12 sprengingar á og við landið. Stærsti skjálftinn, rúmlega 3 að stærð varð á Torfajökulssvæðinu, kl 09:11 að morgni fimmtudags og fannst hann meðal annars í Landmannalaugum. Fjöldi ísskjálfta mældist í Skeiðarárjökli í tengslum við hlaupið úr Grænalóni, sem kom fram í Súlu og Núpsvötnum þriðjudag til fimmtudag.

Suðurland

Á Suðurlandi mældust 44 skjálftar. Fjórir litlir skjálftar voru á Holtasprungu og 15 litlir á Hestvatnssprungu og dreifð virkni (6 skjálftar) var á Hengilsvæði og í Ölfusi (10 skjálftar). Allir skjálftarnir voru undir 1 að stærð.

Sex skjálftar voru dreifðir um Reykjanes. Stærðir þeirra voru á bilinu 0-1,5.

Norðurland

Á Norðurlandi mældust 68 skjálftar. 15 skjálfta hrina vað norður af Siglufirði á mánudagsmorgun. Þeir skjálftar voru á stærðarbilinu 0,7-2,4. Austur af Grímsey mældust 20 skjálftar, þeir voru dreifðir yfir vikuna og á stærðarbilinu 1,0-3,1. Sex skjálftar, 1,2-1,9 að stærð mældust í Skagafirði á sunnudagsmorgun.

Hálendið

Í Mýrdalsjökli voru staðsettir 32 skjálftar á stærðarbilinu 0,7-2,3. Skjálftarnir voru flestir í vestanverðum jöklinum.

Á Torfajökulssvæðinu mældust 4 skjálftar. þrír um 1 að stærð og einn nálægt 3,5 að stærð. Hann varð á fimmtudagsmorgun, kl. 09:11 og innan hálftíma fylgdu honum tveir eftirskjálftar.

Einn skjálfti, 1,2 að stærð mældist við Bárðarbungu.

Við nánari athugun á jarðskjálftagögnum mátti sjá aðdraganda hlaupsins úr Grænalóni, sem kom fram í Súlu og Núpsvötnum, en ísskjálftar fóru að mælast í sunnanverðum Skeiðarárjökli strax í byrjun vikunnar; tveir á mánudag og fimm á þriðjudag, daginn sem flóðið hófst (skv mbl.). Engir ískjálftar mældust á miðvikudag, en þá var flóðið líklega í hámarki. Á fimmtudag mældust svo níu ísskjálftar norðar í Skeiðarárjökli, eða rétt sunnan Grænalóns. Seinasti skjálftinn varð svo aðfararnótt föstudags. Alls voru því staðsettir 17 ísskjálftar á stærðarbilinu 0,6-1,0.

Einn skjálfti um 1 að stærð, mældist við Kröflu.

Kristín S. Vogfjörð og Sigþrúður Ármannsdóttir