	Veðurstofa Íslands Jarðeðlissvið

Jarðskjálftar 20060206 - 20060212, vika 06

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Í vikunni voru staðsettir 338 atburðir og bar mest á jarðskjálftahrinu tæplega 40 km NNV af Grímsey. Stærsti skjálfti vikunnar, 4,0 mældist á sama stað kl 18:00 föstudaginn 10. febrúar. Annars var vikan tíðindalítil.

Suðurland

Á fimmtudagsmorgun milli 05:43 og 06:41 varð lítil hrina við suður enda Kleifarvatns á Reykjanesi; alls mældust þar 16 smáskjálftar, sá stærsti 2,1 að stærð.
Nokkrir smáskjálftar mældust NV við Skálafell á Hellisheiði, líklega í sambandi við prófanir á borholu sem stendur undir Hverahlíð og þykir það áhugavert. Skjálftarnir raða sér í NNA-læga stefnu þ.e. sömu stefnu og yfirborðssprungur á svæðinu. Við prófanir á borholum er oft vatni dælt niður í holurnar undir miklum þrýstingi og það getur breytt spennuástandi á nálægum sprungum.
Annars meinhægt, 2 skjálftar við Vestmannaeyjar.

Norðurland

Tvær hrinur voru á Norðurlandi í vikunni. Á miðvikudag hófst róleg hrina tæplega 20 km A af Grímsey. Hún hélt áfram með hléum þar til á föstudag varð skjálfti að stærð 4,0 (Mlw) tæplega 40 km NNV af Grímsey. Þá dró verulega úr virkni A við Grímsey - sjá einnig mynd af tímaþróun. Hrinan NNV við Grímsey var langt um öflugri, en mest gekk á milli 4 og 7 aðfaranótt 11. febrúar (laugardagur). Stærsti skjálftinn fannst í Grímsey. Hrinan varð rétt við "Hólinn" fyrir staðkunnuga. Í september 2002 varð öflug hrina á sömu slóðum, sjá umfjöllun hér.

Hálendið

Tíðindalítið var á hálendinu, aðeins örfáir skjálftar undir Mýrdalsjökli, Vatnajökli og við Herðubreið.
Auk þess var nokkuð um frostbresti, en þeir eiga til að verða þegar jörð frýs snögglega eftir votviðrasama hlýindakafla.

Halldór Geirsson