	Veðurstofa Íslands Jarðeðlissvið

Jarðskjálftar 20110307 - 20110313, vika 10

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Í vikunni voru staðsettir 222 jarðskjálftar og 3 líklegar sprengingar.

Suðurland

Fáeinir smáskjálftar mældust í Flóanum, við Hestvatn og í Holtum. Stærstu skjálftarnir mældust rúmlega 1 að stærð.

Reykjanesskagi

Tveir jarðskjálftar voru á norðanverðum Reykjaneshrygg. Annar 1,7 að stærð en hinn 1,4.
Jarðskjálftavirkni hélt áfram frá fyrri viku við Núpshlíðarháls og við Krýsvík á Reykjanesskaga. Alls mældust um 80 jarðskjálftar á svæðinu og stærsti skjálftnn var 1,6 stig.
Fimm jarðskjálftar áttu upptök í Lambafellshrauni norðan við Geitafell á Reykjanesskaga og voru þeir allir undir 1 að stærð.

Norðurland

Um 24 jarðskjálftar mældust með upptök í Tjörnesbrotabeltinu. Stærstu skjálftarnir voru við Kolbeinsey. Sá stærsti 2,9 að stærð. Skjálfti að stærð 2,1 átti upptök norðaustur af Grímsey. Tveir skjálftar mældust við Jan Mayen þann 7. mars og 3 skjálftar voru á Kolbeinseyjarhryggnum um 200 km norður af Kolbeinsey.

Tveir skjálftar voru við Kröflu og einn við Þeistareyki.

Síðdegis á mánudeginum og fram á þriðjudaginn var mjög mikið um frostbresti á Mývatnssvæðinu og þar suður af.

Hálendið

Rúmlega 30 jarðskjálftar mældust undir og við Vatnajökul. Stærsti skjálftinn var um 2,8 að stærð með upptök á Lokahrygg þann 12. mars kl. 18:56.
Við Grímsvötn mældust 11 jarðskjálftar og sá stærsti mældist um 1,7 stig.

Við Öskju og Herðubreið voru rúmlega 20 jarðskjálftar. Sá stærsti við Öskju þann 10. mars kl. 20:57, 2,2 að stærð.
Röð af djúpum skjálftum á meira en 20 km dýpi mældust norðaustur af Öskju um kl. 10:05 þann 11. mars. Á skjálftagrafi frá mæli við Öskju sýnir að þetta varaði í um 75 sekundur.

Í byrjun vikunnar mældust fáeinir skjálftar við Þóris- og Geitlandsjökul. Sá stærsti í Þórisjökli þann 7. mars kl. 01:21, að stærð 1,9.
Þrír smáskjálftar áttu upptök við Högnhöfða um 9 km vestnorðvestur af Geysi í Haukadal.

Mýrdalsjökull

Undir Mýrdals- og Eyjafjallajökli mældust 23 skjálftar. Flestir og þeir stærstu um 2 stig áttu upptök í vestanverðum Mýrdalsjökli, Goðabungu. Fjórir skjálftar allir minni en 0 að stærð áttu upptök undir Eyjafjallajökli.

Jarðskjálfti í Japan

Jarðskjálfti að stærð 8,9 (NEIC) varð þann 11. mars og átti upptök í sjó úti fyrir norðausturströnd Honshu eyjar um 130 km austur af borginni Sendai. Svona stórir jarðskjálftar mælast á mælum um allan heim. Skjálftinn mælist td mjög vel í borholumæli á Ásbjarnarstöðum (BORG) í Borgarfirði sem er í um 76° eða 8360 km fjarlægð frá upptökum skjálftans. Sjá má skjálftagröf frá skjálftanum á mælum víða um heim hjá Global Seismograph Network (IRIS/IDA). IRIS hefur einnig sett upp síðu með línuritum frá breiðbandsmælum vítt um heim. Skjálftinn og eftirskjálftar hans koma vel fram á mælum hér á landi eins og td má sjá af óróagröfum frá mælum á Norðurlandi.
Harward háskóli hefur metið stærð brotflatarins ofl í M8.9 skjálftanum.
Jarðskjálftamiðstöðin í Tokyo (ERI) er með upplýsingasíðu um jarðskjálftann og afleiðingar hans.

Gunnar B. Guðmundsson