	Veðurstofa Íslands Jarðeðlissvið

Jarðskjálftar 20210118 - 20210124, vika 03

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Um 560 jarðskjálftar mældust með SIL-mælakerfi Veðurstofu Íslands í vikunni, álíka margir sem og í síðustu viku. Munar þar mestu um meiri virkni á Reykjanesskaga í vikunni. Stærsti skjálfti vikunnar var 3,1 að stærð þann 24. janúar kl. 09:16, á Kolbeinseyjarhrygg. Næststærsti skjálfta varð NA af Siglufirði þann 19. janúar, 2,6 að stærð. Einn smáskjálfti mældist í Heklu og tveir við Grímsvötn, 1,5 að stærð.

Suðurland

Tæplega 15 jarðskjálftar mældust á Suðurlandsbrotabeltinu í vikunni, um helmingi færri en í síðustu viku. Stærsti skjálftinn var 1,5 að stærð, rétt austur af Hestfjall, þann 18. janúar. Rúmlega 10 smáskjálftar mældust á Hengilssvæðinu, allir undir einum af stærð. Einn smáskjálfti mældist í Heklu.

Reykjanesskagi

Um 430 jarðskjálftar mældust á Reykjanesskaga í vikunni, mun fleiri en í síðustu viku þegar 325 skjálftar mældust þar. Stærsti skjálftinn var 2,0 að stærð þann 18. janúar í Fagradalsfjalli. Flestir skjálftar í hrinunni voru staðsettir milli Grindavíkur og Fagradalsfjalls. Nokkrir skjálftar mældust við Kleifarvatn. Rólegt var á Reykjaneshrygg, þar sem fimm smáskjálftar mældust í vikunni.

Norðurland

Um 30 jarðskjálftar mældust á Tjörnesbrotabeltinu í vikunni, heldur færri en í vikunni á undan þegar rúmlega 70 skjálftar mældust þar. Um 20 jarðskjálftar mældust á Húsavíkur-Flateyjar misgenginu og í Eyjafjarðarál. Stærsti skjálftinn var 2,6 að stærð, þann 19. janúar. Fáeinir jarðskjálftar mældust á Grímseyjarbeltinu. Þrír skjálftar mældust á Kolbeineyjarhrygg, sá stærsti 3,1 að stærð þann 24. janúar. Átta skjálftar, allir undir 1,5 að stærð mældust í Öxarfirði. Tæplega fimm smáskjálftar mældust inni á Norðurlandi í vikunni, þarf af einn við Bæjarfjall og þrír við Kröflu.

Hálendið

Um 50 jarðskjálftar mældust á Hálendinu í vikunni, nokkuð færri en vikuna á undan þegar tæplega 70 skjálftar mældust. 15 jarðskjálftar mældust undir Vatnajökli í vikunni, helmingi færri en í vikunni á undan þegar rúmlega 30 skjálftar mældust. Í Bárðarbungu mældust 5 skjálftar í vikunni, mun færri en í síðustu viku þegar 16 skjálftar mældust, sá stærsti 2,5 að stærð, þann 21. janúar. Einn djúpur skjálfti mældist á svæðinu austan við Bárðarbungu þar sem oft mælast djúpir skjálftar. Tveir smáskjálftar mældust í ganginum undir og fyrir framan Dyngjujökul. Tveir skjálftar mældust suðaustur af Hábungu og tveir smáskjálftar við Gjálp. Tveir skjálftar mældust við Grímsvötn, sá stærsti 1,5 að stærð, sem er færri en í síðustu viku. Enginn skjálfti mældist undir Öræfajökli. Rúmlega 30 jarðskjálftar mældust norður af Vatnajökli í vikunni, nokkuð færri en í síðustu viku þegar 40 jarðskjálftar mældust þar. Tæplega 20 af þessum skjálftum mældust við Öskju, sá stærsti 1,7 að stærð. 15 jarðskjálftar mældust við Herðubreið og Herðubreiðartögl, sá stærsti 1,5 að stærð. Einn skjálfti 1,5 að stærð mældist í Hofsjökli. Tveir jarðskjálftar mældust við Langjökul, einn við Geitlandsjökul og einn við Þórisjökul, báðir undir 1,7 að stærð.

Mýrdalsjökull

Tæplega 10 jarðskjálftar mældust undir Mýrdalsjökli í vikunni, mun færri en í síðustu viku þegar rúmlega 20 jarðskjálftar mældust þar. Stærsti skjálftinn var 2,0 að stærð þann 24. janúar. Allir skjálftarnir mældust innan eða rétt við Kötluöskjuna. Tveir skjálftar mældust á Torfajökulssvæðinu, sá stærsti 1,7 að stærð.

Jarðvakt