	Veðurstofa Íslands Jarðeðlissvið

Jarðskjálftar 20210125 - 20210131, vika 04

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Rúmlega 1000 jarðskjálftar mældust með SIL-mælakerfi Veðurstofu Íslands í vikunni, helmingi fleiri en í síðustu viku. Munar þar mestu um meiri virkni á Reykjanesskaga, þar sem um 720 skjálftar mældust, og á hálendinu í vikunni. Stærsti skjálfti vikunnar var M2,9 að stærð þann 27. janúar kl. 13:06 í Þórisjökli í skammvinnri hrinu sem stóð þar yfir frá kl. 09:30 til miðnættis þann 27. janúar. Nokkrir skjálftar yfir M2,0 fylgdu stærsta skjálftanum. Nokkuð mikil virkni var í Vatnajökli í vikunni, einkum í og við Bárðarbungu, þar sem skjálfti af stærð M2,4 mældist og við Grímsvötn mældust 8 skjálftar, sá stærsti af stærð M2,4 þann 29. janúar. Tveir skjálftar yfir M2,3 mældust við Hamarinn. Einn smáskjálfti mældist austur af Heklu og þrír í Öræfajökli.

Suðurland

Rúmlega 10 jarðskjálftar mældust á Suðurlandsbrotabeltinu í vikunni, um helmingi færri en í síðustu viku. Stærsti skjálftinn var 1,3 að stærð, rétt vestur af Selsundsfjalli, þann 31. janúar. Rúmlega 15 smáskjálftar mældust á Hengilssvæðinu, en einn skjálfti mældist við Skálafell á Hellisheiði, M2,5 þann 31. janúar kl. 00:56. Einn smáskjálfti mældist austur af Heklu.

Reykjanesskagi

Um 720 jarðskjálftar mældust á Reykjanesskaga í vikunni, nærri tvöfalt fleiri en í síðustu viku þegar 430 skjálftar mældust þar. Stærsti skjálftinn var 2,2 að stærð þann 25. janúar við Kleifarvatn. Flestir skjálftar í hrinunni voru staðsettir milli Grindavíkur og Fagradalsfjalls. Nokkrir skjálftar mældust við Kleifarvatn, Krýsuvík og í Núpshlíðarhálsi. Rólegt var á Reykjaneshrygg, þar sem átta smáskjálftar mældust í vikunni.

Norðurland

Rúmlega 60 jarðskjálftar mældust á Tjörnesbrotabeltinu í vikunni, heldur fleiri en í vikunni á undan þegar um 30 skjálftar mældust þar. Um 20 jarðskjálftar mældust á Húsavíkur-Flateyjar misgenginu og í Eyjafjarðarál. Stærsti skjálftinn var 2,5 að stærð, þann 29. janúar. Tæplega 20 jarðskjálftar mældust á Grímseyjarbeltinu og um 20 skjálftar mældust í Öxarfirði, sá stærsti M1,9 að stærð. Enginn skjálfti mældist á Kolbeinseyjarhrygg. Tæplega 10 smáskjálftar mældust inni á Norðurlandi í vikunni, allir við Kröflu, var sá stærsti M1,6 að stærð.

Hálendið

Tæplega 160 jarðskjálftar mældust á Hálendinu í vikunni, um þrefalt fleiri en vikuna á undan þegar um 50 skjálftar mældust. Tæplega 80 jarðskjálftar mældust undir Vatnajökli í vikunni, mun fleiri en í síðustu viku þegar um 15 skjálftar mældust. Í Bárðarbungu mældust 19 skjálftar í vikunni, mun fleiri en í síðustu viku þegar 5 skjálftar mældust, sá stærsti M2,4 að stærð, þann 31. janúar. Tuttugu djúpir skjálftar mældust á svæðinu austan við Bárðarbungu þar sem oft mælast djúpir skjálftar. Fimm smáskjálftar mældust í ganginum undir og fyrir framan Dyngjujökul og einn í Kverkfjöllum. Tíu skjálftar mældust við Hamarinn, sá stærsti M2,5 þann 25. janúar, og einn smáskjálfti mældist við Gjálp. Tíu skjálftar mældust við Grímsvötn, sá stærsti M2,4 að stærð þann 29. janúar kl. 23:34. Þrír smáskjálftar mældust undir Öræfajökli. Tæplega 40 jarðskjálftar mældust norður af Vatnajökli í vikunni, nokkuð færri en í síðustu viku þegar um 30 jarðskjálftar mældust þar. Tæplega 10 af þessum skjálftum mældust við Öskju, en um 30 jarðskjálftar mældust við Herðubreið og Herðubreiðartögl, sá stærsti M1,4 að stærð. Rétt rúmlega 9:30 þann 27. janúar hófst jarðskjálftahrina í Þórisjökli og mældust um 40 jarðskjálftar í hrinunni sem stóð til miðnættis þann sama dag. Sá stærsti mældist M2,9 kl. 13:06 þann 27. janúar. Hrinur hafa áður orðið á þessum slóðum, en frá árinu 1991 til dagsins í dag hafa mælst um 1100 skjálftar á svæðinu, sá stærsti M4,5 árið 1999 en einnig nokkrir yfir þremur að stærð. Þrír skjálftar mældust í Hofsjökli, sá stærsti M1,9 að stærð.

Mýrdalsjökull

Tæplega 20 jarðskjálftar mældust undir Mýrdalsjökli í vikunni, mun fleiri en í síðustu viku þegar um 10 jarðskjálftar mældust þar. Stærsti skjálftinn var M1,9 að stærð þann 30. janúar. Allir skjálftarnir mældust innan eða rétt við Kötluöskjuna. Einn smáskjálfti mældist á Torfajökulssvæðinu í vikunni. *

Jarðvakt