	Veðurstofa Íslands Jarðeðlissvið

Jarðskjálftar 20210201 - 20210207, vika 05

PostScript-skrá
Forrit sem les PostScript-skrár má nálgast hér

Sérkort af

[Mýrdals- og Eyjafjallajökli]

[Norðurlandi]

Lýsing á skjálftavirkni vikunnar

Suðurland

Fimm smáskjálftar mældust á Suðurlandsbrotabeltinu í vikunni, færri en vikuna á undan þegar að þeir voru rúmlega tíu. Stærsti skjálftinn var 1,1 að stærð SV við Skarðsfjall þann 2. febrúar kl. 04:57. Stakir smáskjálftar mældust í Heklu. Um 80 jarðskjálftar mældust á Hengilsvæðinu, þar af um 50 við Húsmúla þar sem virknin var mest að kvöldi 6. febrúar og mældist stærsti skjálftinn 1,5 að stærð kl. 23:24. Stærsti skjálftinn í Henglinum mældist 2,2 að stærð þann 2. febrúar kl. 17:18 rétt NA við Ölkeldu. Sjö smáskjálftar mældust við Hrómundartind, fjórir við Nesjavelli og þrír við Raufarhólshelli.

Reykjanesskagi

Rúmlega 1100 jarðskjálftar mældust á Reykjanesskaga í vikunni, fleiri en vikuna á undan þegar að þeir voru um 720. Stærsti skjálftinn mældist 2,6 að stærð rétt austan við Þorbjörn þann 1. febrúar kl. 01:26. Flestir skjálftar voru staðsettir í þremur þyrpingum, rétt austan við Þorbjörn, austan við Fagradalsfjall og við Sandfell. Nokkrir skjálftar mældust við Kleifarvatn og Sýrfell. Á Reykjaneshrygg mældust um fjörtíu skjálftar, mun fleiri en vikuna á undan og voru þeir flestir staðsettir rétt SV af Reykjanestá þann 6. febrúar.

Norðurland

Um 300 jarðskjálftar mældust á Tjörnesbrotabeltinu í vikunni, mun fleiri en vikunni á undan þegar að rúmlega 60 skjálftar mældust. Á Grímseyjarbeltinu mældist um 270 jarðskjálftar, þar af um 235 skjálftar um 10 km NNA af Grímsey í hrinu sem hófst að morgni 4. febrúar og mældist stærsti skjálftinn 2,3 að stærð þann 5. febrúar kl. 04:31. Um 30 jarðskjálftar mældust á Húsavíkur-Flateyjar misgeningu og í Eyjafjarðarál og voru þeir allir undir 1,5 að stærð. Í Eyjafirði mældist smáskjálfti þann 1. febrúar kl. 20:14. Um 10 km austur af Hofsós mældust tveir skjálftar þann 5. febrúar, sá stærri 1,5 að stærð. Tveir skjálftar mældust á Kolbeinseyjarhrygg. Við Þeistareiki mældust þrír skjálftar og tíu við Kröflu og voru þeir allir undir 1,0 að stærð.

Hálendið

Rúmlega 100 jarðskjálftar mældust á hálendinu í vikunni, færri en vikunni á undan þegar að tæplega 160 skjálftar mældust. Við Herðubreið og Herðubreiðartögl mældust rúmlega 40 jarðskjálftar, helmingi fleiri en vikuna á undan og munaði það um smáhrinu sem varð 7. febrúar rétt austan við Herðubreið þar sem stærsti skjálftinn var 2,0 að stærð. Níu jarðskjálftar mældust við SA brún Öskju, sá stærsti 2,0 að stærð kl. 09:58 þann 4. febrúar.

Tæplega 40 jarðskjálftar mældust undir Vatnajökli, um helmingi færri en vikunni á undan. Sextán skjálftar mældust í Bárðarbungu, svipað og vikunni á undan og var stærsti skjálftinn 2,3 að stærð 2. febrúar kl. 12:40. Austan við Bárðarbungu mældust tveir djúpir smáskjálftar og undir Dyngjujökli mældist einn smáskjálfti. Við Hamarinn mældust fimm smáskjálftar og fjórir við eystri Skaftárketil, sá stærsti 1,7 að stærð þann 3. febrúar kl. 00:22. Við Grímsvötn mældust þrír skjálftar, færri en vikuna á undan þegar þeir voru tíu talsins. Sitthvor smáskjálftinn mældust rétt SV við Háubungu og vestan við Grænafjall. Þrír smáskjálftar mældust í Skaftafellsjökli, Fallsjökli og efst í Breiðamerkurjökli. Tveir jarðskjálftar mældust í Höfsjökli þann 5. febrúar, sá stærri 2,9 að stærð kl. 20:02. Tveir skjálftar mældust í SV-verðum Langjökli, einn norðan við Hagavatn og tveir í Skjaldbreið.

Mýrdalsjökull

Sextán jarðskjálftar mældust undir Mýrdalsjökli í vikunni, svipað og vikuna á undan, stærsti skjálftinn mældist 2,5 að stærð þann 5. febrúar kl. 00:39. Allir skjálftarnir mældust innan eða rétt við Kötuluöskjuna. Enginn jarðskjálfti mældist á Torfajökulssvæðinu.

Jarðvakt