Úrvinnsla á útstöðvunum

Á útstöðvunum er hugbúnaður sem sér um gagnasöfnunina frá stafsetjara, úrvinnslu gagna á staðnum og sendingu gagnanna til SIL-miðstöðvarinnar á Veðurstofunni. Fylgst er með hvort snöggar breytingar verði á jarðarhreyfingunni og slíkar breytingar skráðar. Hver skráður fasi er meðhöndlaður sem væri hann raunverulegur jarðskjálftafasi. Auk mats á komutíma fasans er tíðniróf hans reiknað og metin lágtíðniaðfella þess og horntíðni, hámarks útslag, innfallshorn, samfösun (e. coherence) og tímalengd (e. duration) fasans og fleiri stærðir sem komið geta að gagni við áframhaldandi úrvinnslu. Til að meta hvort fasinn er líkari P eða S skjálftabylgju er notað tauganet sem ,,kennt`` hefur verið að þekkja muninn á þessum tveimur tegundum skjálftafasa. Stutt skeyti (128 bæti) með upplýsingum um fasann er sent til miðstöðvarinnar fyrir hvern skráðan fasa jafnharðan og hann greinist.