Fréttir 2007

Jarðskjálftahrina á Reykjaneshrygg 9. apríl 

Í kvöld, 9. apríl 2007, frá kl. 22:30 byrjaði jarðskjálftahrina á Reykjaneshrygg, um 30 km suðvestur af Reykjanesi. Nokkrir jarðskjálftar voru um 3 á Richterkvarða. Jarðskjálftahrinur eru algengar á þessu svæði.

Matthew J. Roberts
Eðlisfræðisviði, Veðurstofu Íslands

Jarðskjálftahrina á Reykjaneshrygg 26. febrúar

Jarðskjálftahrinan, sem hófst í gærkvöldi á Reykjaneshrygg, stóð með hléum fram eftir degi í dag (27.febr). Stærstu skjálftarnir eru 4 stig að stærð, en á annan tug skjálfta eru 3 stig eða stærri. Hrinan virðist í rénun.

Þórunn Skaftadóttir
Eftirlitsdeild, Veðurstofu Íslands

Jarðskjálftahrina á Reykjaneshrygg 26. febrúar

Milli klukkan 21:30 og 22:30 í gærkvöldi, 26. febrúar, mældist jarðskjálftahrina á Reykjaneshrygg um 10 km SV af Eldeyjarboða (um 65 km SV af Reykjanestá).
Virknin tók sig upp aftur um kl. 4 í nótt með stærri skjálftum og mældust þeir stærstu kl. 5:25 og 5:51 af stærð u. þ. b. 4. Um 10 skjálftar mældust stærri en 3. Verulega dró úr hrinunni upp úr kl. 8 í morgun, en síðan þá hafa mælst stöku skjálftar. Skjálftavirknin í nótt er á eldvirku svæði, en ekki er að sjá neina eldvirkni samfara þessum skjálftum.

Jarðskjálfti við Kistufell 12. janúar

Í gærkvöldi 12. janúar kl 22:54 varð jarðskjálfti við Kistufell í norðanverðum Vatnajökli. Skjálftinn var 3,5 stig og nokkrir fleiri fylgdu á eftir, sem allir voru minni en 2 stig að stærð. Jarðskjálftar eru algengir á þessum slóðum.

Jarðskjálfti norður af Siglufirði 11. janúar.

Í dag 11. janúar 2007, kl. 17:26 varð jarðskjálfti að stærð 3,3 með upptök um 33 km norður af Siglufirði. Tveir aðrir skjálftar að stærð um 3 áttu upptök á sömu slóðum kl. 18:10 og 18:15.
Nokkrir eftirskjálftar hafa fylgt þessum skjálftum. Engin vitneskja er um að þeir hafi fundist.
Jarðskjálftar eru algengir á þessu svæði.