Eðlisfræðisvið

Eðlisfræðisvið rekur og sér um þróun á fjölmörgum sjálfvirkum mælikerfum, auk þess að reka mannaðar mælistöðvar. 

Til sjálfvirku stöðvanna teljast:

• SIL-jarðskjálftamælikerfið, sem byggir á 41 mælistöð víðs vegar um land með miðstöð á Veðurstofunni
• GPS-mælikerfi sem byggir á 13 stöðvum
• 6 þenslumælar
• 85 sjálfvirkar veðurstöðvar
• 3 eldingamælistöðvar
• Veðursjá á Miðnesheiði

Mannaðar stöðvar eru eftirfarandi:

• 118 veðurstöðvar sem skiptast í 46 skeytastöðvar, 16 veðurfarsstöðvar, 55 úrkomustöðvar og 1 sólskinsstundamælistöð
• Mengunarmælingar í andrúmslofti og úrkomu gerðar á 4 stöðvum
• Á veðurstöðinni  í Keflavík eru gerðar synop-mælingar á þriggja tíma fresti, metar-athuganir á hálftíma fresti og háloftaathuganir tvisvar á sólarhring
• Veðurathuganir á hafinu kringum landið eru í umsjá sviðsins og eru þær gerðar bæði á skipum og með veðurduflum
• 20 snjóflóðaeftirlitsmenn á völdum stöðum á landinu fylgjast með og mæla snjóalög á vetrum.

Mikilvægur þáttur í starfsemi sviðsins er jarðváreftirlit, en undirstaða þess er SIL-kerfið. Samfelldar mælingar á landbreytingum á GPS-stöðvum er vaxandi þáttur í þessu eftirliti, en þenslumælingar eru einnig mikilvægur hluti. Eðlisfræðisvið nýtir ennfremur mælingar annarra stofnana við jarðváreftirlit, t.d. mælingar á vatnshæð í borholum, svo og rennsli og efnasamsetningu í nokkrum ám á eldvirkum svæðum. Eftirlitskerfið er í stöðugri þróun og einnig svokallað bráðavárkerfi, en það byggir á því að nýta alla tiltæka þekkingu og símælingar til að gefa út viðvaranir og til að auðvelda hröð samskipti við almenning og stjórnvöld þegar hamfarir steðja að.

Á sviðinu fara fram rannsóknir á jarðskjálftum og jarðskorpunni, landreki og landrisi, jarðskjálftahættu, eldingum, efnamengun í andrúmslofti og úrkomu. Markmið rannsóknanna er að auka þekkingu og þróun, og viðhalda þannig traustum stoðum undir eftirlitsþáttum sviðsins, þannig að það megi áfram vera í fremstu röð. Þessar rannsóknir eru oft unnar í samvinnu við aðra aðila og stofnanir.