Fréttir

Stórskjálfti við Súmötru í Indónesíu 26. desember 2004 kl. 00:58 UTC

Stórskjálfti af stærðinni Mw=8,9 varð 26. desember kl. 00:58 UTC við vesturströnd eyjunnar Súmötru í Indónesíu. Skjálftinn, sem var grunnur, varð við samgengishreyfingar á mótum Indlands- og Burmaplatnanna  (sjá meira um hann hér ).
Skjálftinn sést vel á jarðskjálftamælum Veðurstofunnar, en yfirborðsbylgjur frá honum ollu tæplega 9 mm útslagi á mælinum á Gilhaga í Öxarfirði. Lóðrétta-, radíal- og tangentþátt skjálftaritanna má sjá hér. Helstu rúmbylgjur (P, PP, S) og yfirborðsbylgjur (L=Love, R=Rayleigh) eru merktar inn á skjálftaritin.

Kristín Vogfjörð vogfjord@vedur.is
Veðurstofa Íslands.

Jarðskjálfti sem mældist 3,7 á Richterkvarða varð u.þ.b. 15 km SV af Kópaskeri, 24. desember kl. 19:39. Engar tilkynningar bárust Veðurstofunni um að hann hefði fundist.
Nokkrir minni eftirskjálftar fylgdu í kjölfarið og stóðu þeir til u.þ.b. kl. 22:00 um kvöldið.
Engar frekari hræringar hafa orðið í Öxarfirði.
Hér má sjá kort sem sýnir jarðskjálftavirkni í Öxarfirði síðustu daga.

Matthew J. Roberts
Eðlisfræðisviði Veðurstofu Íslands

Stórskjálfti af stærðinni M=7,8 varð 23. desember kl. 14:59 UTC   norður af Macquarie-eyju fyrir sunnan  Ástralíu.
Skjálftinn sést vel á jarðskjálftamælum Veðurstofunnar. Hér sést útslag hans á mælinum á Gilhaga í Öxarfirði.

Kristín Vogfjörð vogfjord@vedur.is
Veðurstofa Íslands.

Jarðskjálfti fyrir mynni Eyjafjarðar 22. nóvember 2004.

Í dag 22.11. 2004 kl. 12:29 varð skjálfti að stærð 3,4 með upptök fyrir mynni Eyjafjarðar. Engir eftirskjálftar fylgdu í kjölfarið. Upptökin eru á svonefndu Húsavíkur-Flateyjarmisgengi þar sem jarðskjálftar eru tíðir. Engin tilkynning hefur borist um að skjálftinn hafi fundist.

Hér má sjá nýjustu fréttir af Grímsvatnagosinu.

Skjálftavirkni 2. - 3. nóvember 2004

Virknin í gosstöðvunum í Grímsvötnum hefur verið nokkuð breytileg í nótt og virðist nú heldur minni en í gær. Um miðnættið dró nokkuð úr krafti gossins, en jókst svo aftur um kl. 02:30 og hefur verið nokkuð svipað síðan.
Skjálftavirkni er þar ekki mikil, tveir skjálftar um 2 að stærð mældust um 2 leytið í nótt.
Sjá .http://hraun.vedur.is/ja/grf_trem.gif

Nokkur skjálftavirkni hefur verið á Reyjaneshrygg og hafa þar mælst nokkrir skjálftar síðan um kl 3 í nótt. Þeir eru 2-3 að stærð.

Hér má sjá óróaplott frá öllum jarðskjálftastöðvum Veðurstofunnar. Takið eftir að gosóróinn sést á mælum sem eru langt frá Grímsvötnum, t.d Haukadal á Suðurlandi og Grímsstöðum.

Upplýsingar frá viku 44 (25. okt. - 1. nóv). 

Aukin virkni hefur verið alla vikuna í Grímsvötnum í Vatnajökli og hafa nú mælst þar 30 skjálftar, þar af nokkrir yfir 2 að stærð. Óróahviður sáust á mælinum á Kálfafelli á fimmtudag. Sjá óróann þá á mismunandi tíðniböndum á Kálfafelli og á Grímsfjalli. Mikil smáskjálftavirkni er greinileg á Grimsfjalli. Óróinn á Kálfafelli var lotubundinn og mest á tíðniböndunum 6-7 Hz og 3-5 Hz (sjá tíðniróf á lóðrétta þætti mælisins á Kálfafelli milli kl. 12:00 og 12:25 á fimmtudag. Um hádegi á föstudag komst leiðniskynjari Vatnamælinga Orkustofnunar (sjá hér) aftur í snertingu við vatn og sýndi þá töluvert aukna leiðni. Allt þetta gaf til kynna að Skeiðárarhlaup væri farið að grafa um sig. Kl. 4:45 á föstudagsnótt fóru að mælast ísskjálftar í Skeiðararjökli. Alls hafa nú mælst þar 10 ísskjálftar. Leiðni og vatnshæð hafa einnig vaxið frá því á föstudagsnótt. Bakgrunnsórói á mælinum á Grímsfjalli á hádegi á sunnudag sést hér. Hann fer vaxandi eins og sjá má hér (sjá hér).

Eldgos í Grímsvötnum 2. nóvember (kl. 03:49)

Vörubílsstjóri við Kárahnjúka hafði samband við Almannavarnadeild Ríkislögreglustjóra og tilkynnti að hann sæi gosmökkinn. Mökkurinn féll nokkuð inn í skýin, en lýstist reglulega upp af eldglæringum.

Eldgos í Grímsvötnum 2. nóvember.

Gosóróinn frá Grímsvötnum hefur verið nokkuð stöðugur síðan upp úr kl. 23 þ. 1.11.04. Fyrstu merki um gosmökk sáust á veðurradar Veðurstofunnar kl. 23:10 og náði mökkurinn þá upp í um 8 km hæð. Kl. rúmlega 1 í nótt náði mökkurinn upp í um 13 km hæð, en hefur verið nokkuð breytilegur síðan þá (þetta er skrifað kl. 2:35). Gosmökkurinn sýnist á radarmyndinni vera frekar sunnarlega miðað við Grímsvötn, en að öllum líkindum er það vegna ónákvæmni í mælingunum, en radarinn er í um 260 km fjarlægð frá gosinu. Margt bendir til að gosið núna sé norðan við gosstöðvarnar frá 1998, en enn hefur ekkert verið staðfest í þeim efnum.

Skjálftavirkni í Grímsvötnum 1. nóvember 2004.

Kl. 20:34-20:38 í kvöld sendi Veðurstofan frá sér eftirfarandi tilkynningu

„ Í framhaldi af vaxandi jarðskjálftum undanfarna daga og sérstaklega í dag  hófst samfellt hrina jarðskjálfta og óróa kl. 20 10 í kvöld. Líklegt má telja að þá hafi gos hafist í eða við Grímsvötn. Fylgst verður með framvindunni á Veðurstofunniu.

Ragnar Stefánsson “

Nú er klukkan 23:30:
Í framhaldi af ofnaskráðri frétt hefur verið fylgst með framvindunni á Veðurstofunni og smám saman orðið ljósara að um gos er að ræða og það upp úr ísnum. Það er erfitt að dæma um það með fullri vissu hvenær gosið hefur komist upp úr ísnum. Mjög líklegt er  að það hafi komist upp úr ísnum um kl. 21 50. Þá hætta að vera skjálftar í óróanum, sem bendir til að gosrásin upp úr sé orðin greið.
Það hefur enn ekki sést til gossins en það stafar væntanlega af því að þarna er slæmt veður og afleitt skyggni.
Þegar borinn er saman gosóróinn og jarðskjálftar núna og fyrir gosið 18. desember 1998, bendir það til þess að um svipaðan atburð sé að ræða. Þó voru skjálftar miklu meiri á undan gosinu 1998, sérstaklega síðustu 5 klukkustundirnar á undan gosinu. Þessi mismunur gæti stafað af því að gosið núna ætti greiðari leið en þá upp á yfirborðið vegna þess hve stutt er frá gosinu 1998.
Varðandi nákvæma staðsetningu gossins virðist það vera í eða nálægt Grímsvötnum. Ekki er þó hægt að útiloka að það sé aðeins sunnar, jafnvel aðeins sunnan við Grímsfjall.
Búið er að loka veginum um Skeiðarársand, þar sem búast má við auknu vatnsrennsli í hlaupinu sem nú stendur yfir..

Áfram verður fylgst framvindunni á Veðurstofunni í nótt.

Ragnar Stefánsson, 8994805, 4663125
Steinunn Jakobsdóttir, 522 6168
Matthew Roberts, 5226148

Skjálftavirkni í Grímsvötum (1. nóv. 2004).

Seinsustu tvær vikur hefur verið aukin skjálftavirkni í Grímsvötnum í Vatnajökli og hafa stærðir skjálftanna farið vaxandi frá um 1 upp í stærð rúmlgega 3 í morgun kl. 6:51. Á fimmtudag varð vart lágtíðni óróahviða á mælinum á Kálfafelli á Síðu sem gaf til kynna að Skeiðarárhlaup væri um það bil að hefjast. Á föstudag fór svo leiðniskynjari Vatnamælinga Orkustofnunar við Skeiðarárbrú að sýna aukna leiðni og fljótlega upp úr því fór vatn að hækka í Skeiðará. Ískskjálftar í Skeiðarárjökli fóru að mælast laust fyrir kl. 5 á föstudagsnótt og hafa haldið áfram síðan. Auk skjálftavirkninnar í Grímsvötnum heldur lágtíðni bakgrunnsórói á Grímsfjalli áfram að hækka. Fylgst verður áfram með framvindu skjálftavirkninnar í Grímsvötnum og hlaupinu í Skeiðará.

sjá http://hraun.vedur.is/ja/viku/2004/vika_44/index.html

og http://hraun.vedur.is/ja/viku/2004/vika_45/index.html

Jarðskjálftahrina norður af Hveravöllum 1. október 2004.

Síðustu tvo sólarhringa hefur verið smáskjálftahrina í Guðlaugstungum 20 km norður af Hveravöllum. Í nótt klukkan 5:43 varð skjálfti þar að stærð 3,3. Frá áramótum hefur verið nokkur skjálftavirkni á þessum slóðum sem er óvanalegt.

Jarðskjálftahrina NNA af Siglufirði.

Þann 27. ágúst 2004 hófst jarðskjálftahrina um 22 km NNA af Siglufirði. Hrinan fór rólega af stað, en frá 01:00 til 14:00 þann 28. ágúst náði hrinan hámarki. Þá mældust stærstu skjálftarnir í hrinunni til þessa, 2.8 að stærð.
Um klukkan 6 í morgun (29. ágúst) tók virknin aftur við sér, en þó ekki eins ákaft og í gær. Nú þegar hafa mælst yfir 120 jarðskjálftar á svæðinu.
Skjálftavirkni á þessum slóðum er algeng. Í september 2001 varð hrina á sama stað þar sem mældust yfir 120 jarðskjálftar og stærsti skjálftinn var 3.6 að stærð.